August 18-ah Imran Khan-a lalut dawn : PTI official

Imran Khan chu August 18 hian Pakistan Prime Minister thar atan lakluh a ni dawn niin an party official Faisal Javed Khan chuan a sawi leh.

Prime Minister thar lakluh hun tur chungchangah hian report hrang hrang a lo awm tawh a, an party Pakistan Thereek-e-Insaf (PTI) chuan August 13-ah lakluh a ni dawn tih an sawi a, a hnuah ram Independence Day zawh hnu August 15 emaw 16-ah emaw lakluh ni dawn tih sawi a ni leh bawk. Hemi hnu hian PTI official chuan August 18-ah zawk lakluh a ni dawn tih a sawi leh a ni. Mahse hei pawh hi an party chuan official-in an la puang lo.

Imran Khan hian PM atana lakluh a nih hunah pawh a hautak lo thei anga bera kalpui a duh thu a sawi a, ramdang palaite pawh sawm an tum lo nia sawi a ni.

PTI hi Parliament inthlanah party mala seat la hnem ber ni mah se sorkarna siam tura seat mamawh zat ala nei pha lo a, party tenau zawk leh indepedent member-te thawhpui a tum a ni.

Kar kalta Inrinni khan Election Commission of Pakistan chuan reserved seat-te chu party hrang hrangah elected member an neih zat a zirin a sem a, PTI hi hmeichhia leh non-Muslim tana reserve seat 28 pek an ni a, hengte nen hian sorkar siam thei tura seat a mamawh belh zat chu 14 chauh a ni ta a ni. Parliament lower house National Assembly-ah hian hmeichhe leh minorities tana seat reserve hi 60 a awm a ni.