France chuan nikum November thlaa firfiakten Paris khawpui an beih hnua emergency a puan chu thla hnih atan pawhsei chhunzawm zel a tum a, hei hian Euro 2016 Football tournament an thlen tur thleng a huam thei dawn a ni.
Prime Minister Manuel Valls chuan nimin khan hemi chungchang hi France Info radio-ah sawichhuakin, an ramin thil lian tham tak a thlen dawn avangin venhimna lam khauh zawka kalpui a nih theihna atan emergency puan chhunzawm hi an tum ta niin a sawi a, hemirual hian emergency chu puan reng an tum lo tih a sawi tel nghal bawk.
Euro 2-16 hi June 10 hian ṭan a ni dawn a, thla khat chhung a awh dawn a ni. He hunah hian inkhel thlirtu mi maktaduai 2.5 vel an awm beisei a ni a, stadium 10-ah match 51 khelin, team 24 an awm dawn a ni. Khawpui lian hrang hrangah fan zone siam tum a ni bawk.
Emergency puan hian sipai leh police te hnenah thuneihna sang zawk a pe a, tuna an puan mek hian May 26 thleng a awh ang. Security force-te hian ram himna tiderthawng thei nia an rinhlelhte chu thubuai siamsak emaw, manna thupek emaw tichhuak kher loin an chennain te an dap sak theih bakah, an hreng zui thei a ni.
Valls chuan emergency pawhsei an tumna chu Interior Minister Bernard Cazeneuve-an minister dangte hnenah a rawt ang a, hemi hnu hian Parliament-ah vote lak a ni ang.
Euro 2016 neih tur atan France chu a inbuatsaih nasa tawh hle a, venhimna pawh ṭum dang zawng aia tihkhauh a ni ang. State de France-ah chuan security official 1,200 dah an ni dawn a, stadium tina security duty an dah tur hi chawhrualin 900 vel zel an tling dawn a, heng mite bakah hian volunteer usher 200 leh medical duty mi 80 zel dah an ni bawk ang.
