Ecuador-ah chin hriat lohin mi tam tak la awm

Ecuador ramah magnitude 7.8-a naa lirnghing vanga thi chu mi 525 an ni tawh a, lirnghing hnu hian mi tam tak chin hriat lohin an awm bawk.

Thuneitute chuan chin hriat lohin awm zat hi 1,700 vel zet an ni tih an sawi a, hei vang hian thi zat pawh hi an la punchhoh an rin thu an sawi. Hetihlai hian lirnghingin in a sawi chim hnuaia tangte zawn leh chhanchhuah hna chu ngawrh taka thawh chhunzawm reng a ni. Ui fing leh khawl hman a ni a, mahse in chim hnuaia awmte nungdama chhanchhuah beiseina a chau tawh hle tih an sawi.

Lirnghing vang hian mi sang tel chu chenna in nei loin an awm a, ei tur leh tui thianghlim in tur mumal an nei lo. World Food Programme leh Oxfam chuan lirnghing tuarte chhawmdawlna tur hi a thawn mek a, UN chuan thlawhtheihna hmangin ei tur thlak a tum tih a sawi bawk.

Interior Minister Jose Serrano chuan chin hriat loha awmte nungdama hmuh beiseina a tlem tawh tih sawiin, ruang zawn hna an thawk ngawrh tawh zawk dawn tih a sawi. In chimin a delhhlum, ruang an hmuhchhuah tawh zingah hian UK, Ireland, Canada, Colombia, Cuba leh Dominican Republic ram mite pawh an tel.

UNICEF chuan Ecuador rama chhiatna thleng hi naupang 150,000 zetin an tuar tih a sawi a, chhanchhuah hna thawh chu leiminin hmun tam tak a tibahlah niin a sawi bawk. Khaw tam tak chu nimin thleng khan power supply nei loin an la awm.

Spanish Red Cross chuan Ecuador ram mipui nuaikhat chuang zet chu ṭanpui ngaiin an awm mek tih a sawi a, interanational leh aid organization hrang hrang chuan ṭanpuina pawh an thawn tawh a ni. WFP chuan mi 8,000 ei tur a thawn lut tawh a, UN refugee agency (UNHCR) chuan puan-in leh thosilen thawnluh a tum bawk. Save the Children chuan lirnghinna biala naupangte chuan an zirna an chhunzawm zel theihna turin theihtawp an chhuak mek tih a tarlang.