Association of Tennis Professionals (ATP) hi mipa tennis thuneitu sang a ni a, hmeichhe lamah chuan Women's Tennis Association (WTA) a lal ve thung - tun hnaiah player langsar hrang hrangin ATP leh WTA hi hmun khata awmkhawm an duh thu an sawi.
Roger Federer chuan twitter lamah, "Mipa leh hmeichhe tennis zai khat vuana kan awmkhawm theih nan tun hi hun ṭha a ni ang a, keimah chauh hi hetianga ngaihdan nei hi ka ni ang em aw?" tiin zawhna a siam.
Grand Slam vawi 20 champion tawh Federer chauh hi insuihkhawm duh a ni lo, player langsar tak tak ten an thlawp. Thlawptu zingah Rafael Nadal, hmeichhe world number 2 Simona Halep leh Garbine Muguruza te an tel.
Nadal chuan, "Khawvelin hun harsa kan tawh lai hi insuihkhawm theihna remchang atana kan hman theih chuan a ropui khawp ang," a ti. ATP chairman Andrea Gaudenzi pawhin a hrana kal reng ṭha a tih loh thu a sawi avangin inzawm dan kawng an dap ngei a rinawm.
ATP leh WTA
International Tennis Federation (ITF) chu khawvel puma tennis thuneitu sang ber a ni a, a hnuaiah hian ATP leh WTA an awm. ITF hi thuneitu sang ni mah se a hnuaia mite hi a duh ang angin a awmtir ngai lo.
Mipa tennis thuneitu ATP hi 1972 a din daih tawh kha a ni, anni hian mipa inelna hrang hrang leh ranking thlengin an thunun. WTA pawhin hmeichhe tournament leh ranking a buaipui ve thung a, anmahni huangah chuan thuneihna tawp an nei ve tho.
Inelna lian Grand Slam-ah chuan tournament buatsaihtu lamin thuneihna an nei sang ve leh thung a, tournament organizer-ten ATP leh WTA thawhpuiin inelna lian hi an buatsaih ṭhin a ni.
Grand Slam bikah chuan ATP leh WTA-te hi inelna buatsaihtu lamin hmun khatah a hruai khawm mai ṭhin a, TV lamah pawh hmun khatah an chhuah ṭhin. Mahse, tournament lian lo deuh zawkah chuan an kal hrang - tournament thuhmun ni si kha TV lama a chhuahna a hran chang a awm.
Tun hma chuan mipa ten hmeichhia aiin an hlawh hnem a, major tournament-ah chuan set an khel hnem zawk bawk. Tun hnuah erawh mipa inkhel hi entu tam leh mipui ngaihven ni mah se hmeichhia nen an hlawh erawh a inzat tawh.
Roger an thlawp
Swiss star Roger Federer chuan, "Mipa leh hmeichhia ten tournament inkhelh pawlh ang u ka tihna a ni lo a, thuneitu hrana kan awm hi hmun khatah awm ila, pawl lian leh chak zawk kan ni thei ang. Logo hran, website hran leh tournament kalphung ṭhenkhat a hrana neih hi chuan a fuh tawk lo," a ti.
Wimbledon champion Simona Halep chuan Federer a thlawp thu sawiin, "Mal in i awm lo e," a ti. Spanish nula Muguruza pawhin, "A ṭha, ngaihtuahna ṭha tak a ni," tiin a lo thlawp ve bawk. Wimbledon vawi hnih champion tawh Petra Kvitova leh Argentine nula Diego Schwartzma te pawhin an thlawp.
American tennis legend Billie Jean King, WTA tana mi pawimawh leh sulsutu pawhin inzawm a duh. King-i chuan, "Hun rei tak aṭang khan insuihkhawm hi ka hmathlir a lo ni ve tawh. Duh thuhmun kan tam ta hi ka lawm, thu hi a takah i chantir ang u," a ti.
ATP leh WTA ten suumdawnna leh TV lama pek chhuahna kawngah inremna hran tam tak an nei a, tun dinhmunah chuan awlsam taka inzawm ngawt theih a ni lo. Inzawm hi thil theih loh a ni lo a, mahse hmun khata awm khawm tur erawh chuan hun a la duh rei deuh ang.
Covid-19 vangin tennis hi a chawl mek, a hma berah July thla chawhnu lam hma chuan inelna a awm hmel lo. French Open chu September atan sawn a nih bakah, grass court inelna lian Wimbledon chu Indopui II-na hnua a vawi khat nan ṭhulh a ni bawk.
