Inbuatsaih nan kar hnih tal a ngai - Chris Paul
Oklahoma City Thunder star Chris Paul chuan NBA regular season an khelh chhunzawm leh theih a beisei a, inelna tak an hmachhawn leh hmain chawlhkar hnih tal inbuatsaihna neih hmasak an mamawh thu a sawi bawk.
Basketball inelna lian leh ngaihhlut NBA hi Covid-19 vangin March 11 aṭang khan tiam chin awm loa tih tawp lailawk a ni. Nimin tlai tleng khan hri leng vang hian khawvel pumah mi 184,100 chuang an thi tawh.
United States chu hri leng tuar na berte zinga mi an ni, a bik takin New York khawipuiah kai leh thihpui an tam - coronavirus vang hian NBA regular season kal lai pawh khelh zawh theih loh a hlauhthawn awm hman hle.
All Star zinga vawi 10 tel tawh Paul chuan, "League-ah hian player 450 chuang kan awm, entu nei loin inkhel dawn pawh ni ila a harsa tham hle ang tih chu a chiang. Inkhel turin player ringawt a tawk lo a, midang che vel an awm ve a ngai.
"Kei chuan inkhelh chhunzawm theih ka duh, chutihrualin player zawng zawng kan dinhmun leh hmunhma neih a inang lo. Ṭhenkhat chuan mahni inah ṭha taka training an neih reng laiin inkhel thei lem lo pawh an awm, chuvangin match kan neih leh hmain a rei lo berah kar hnih vel tal chu inbuatsaihna hun kan neih a ngaiin ka hria," a ti.
NBA regular season bikah match khelh hmabak 18 vel ṭheuh an la nei, a hnu lamah a sang pariat chinin playoff an khel ang. Conference champion an zawn hnuah NBA Finals khelh tur a la awm avangin season pumpui zo tur chuan hmabak a la tam hle.