Premier League: En man awm loa pekchhuah tur?

Mizote ngaihven Premier League pawh chawlh mek a ni a, English top flight football hi engtikah nge an khelh ṭan leh dawn hriat theih a la ni lo - season hman zawh hram an tum a nih pawhin entu awm loa khelh zawh a ngaiin a rinawm. 

Oliver Dowden chuan, "Premier League hnenah ka sawi tawh a, infiamna liantham zinga inelna ṭan chhunzawm leh hmasa ber an nih chuan a thlawna en theih tura an inkhelte buatsaih a ngai. 

"Entu awm loa bul ṭan a ngai ang a, mipui tam zawkin in lam aṭang pawha an en theih leh si loh chuan a fel dawn lo a ni," a ti a, Premier League thuneitute chu league ṭan leh hunah a thlawna en theih tura pe chhuak tura a ngen thu a sawi. 

Dowden hian tun hnaia UK-a Covid-19 darh chhan zinga puh Liverpool vs Atletico Madrid inkhel pawh kha a sawi chhuak a, "Mithiamte rawn chunga kha punkhawm kha phal mai kan ni," tiin a insawifiah.

Champions League round of 16 second leg-a Liverpool-in Atletico Madrid an mikhual dawn khan Covid-19 hlauhnain khawvel a man ṭan a, Reds manager Jurgen Klopp chuan an match kaltlang tir a ni kha na takin a lo sawisel tawh. 

Klopp hian an inkhelh dawn khan Atletico boss Diego Simeone pawh a chibai ngam lo a, Liverpool fans zinga amah chibai lo tumtu pawh a hau hial - German coach hlauhthawnna hi tun hnaiah a lang chhuak. 

March 11-a Reds leh Atletico inkhel kha Liverpool khawpuia coronavirus darh chhanah ngaih a ni a, inkhel en tur khan Europe-a Covid-19 tuar na ber pawl Spain khawpui Madrid aṭangin fans 3000 zetin Liverpool an pan. 

Anfield-a inkhel kha mi 52,000 chuangin a hmunah an en a, UK deputy chief scientific adviser Angela McLean chuan, "Liverpool-a hri leng leh Spain lama hri leng inlaichin dan hriat hi a châkawm tawh takzet a ni," a ti. 

Liverpool city council's director of public health Matthew Ashton chuan, "Kha inkhel kha thleng lo tawp tur a ni a, khatihlai khan sorkar khan hetiang tak hian a hlauhawm ang tih a hrethiam lo a ni," tiin a lo sawi tawh bawk. 

Madrid mayor Jose Luis Martinez-Almeida chuan, "Tihsual lian tak a ni a, Atletico fans 3000 vel Anfield-a an va zin kha a ṭul lo takzet a ni," a ti - Liverpool NHS damdawi inah hian Covid-19 vangin mi 246-in nunna an chan tawh. 

 Dowden erawhin sorkar thutlukna lo awm tawh chu chhanin, "SAGE (Scientific Advisory Group for Emergencies) leh medical officer-te kan rawn reng a, infiamna lama thuneitute nen pawh an inbia," a ti a, a hunlaia a hlauhawm loh vanga match kha kaltlangpui a nih thu a sawi. 

Tun hnai infiamna khawvela titi luahtu lian tak pakhat chu Newcastle United lei tumna awm chu a ni a, English club lei tumtu zinga Saudi Arabia Public Investment Fund an tel vang a ni pakhat. 

Magpies lei tum zinga Saudi PIF tel hi duh loin television channel lar beIN Sports leh mihring dikna chanvo humhalhtu pawl Amnesty-te chuan Premier League an be tawh a, English football-a Saudi sorkar inrawlh theihna chu do turin an ngen. 

Hetiang a nih avang hian Department for Digital, Culture, Media and Sport committee-ah pawh Dowden hi Magpies lei tumnaa a inrawlh leh rawlh loh zawh a ni a, mihring zalenna lama hmingchhe tak Saudi Arabia-in UK lama sumdawnna zauh an tum hi an duh lo niin a lang. 

Mahse, Dowden chuan, "Kan tih tur a awm lo a, Football Association lam tih tur a ni. Endikna an neih ṭhinte uluk taka an kalpui ka beisei," a ti - Premier League chuan pound maktaduai 300-a Newcastle lei tumna chungchanga zirchian ngaite a zirchiang mek a ni.