Manipur-a civil society organisation 13-te chuan buaina chhuah tharna, Manipur-a tlangram huam chhungah Thawhlehni, November 12 zan dar 6 aṭang khan nizan November 13 zan dar 6 thleng shutdown an puang.
Shutdown puangtu zingah hian International Peace and Social Advancement (IPSA), Peoples Action for National Democratic Movement (PAMDM), leh Kangleipak Lamjing Apunba Meira Paibi Lup (Kanglamei) te an tel. Kuki pawl mi leh sate nia sawite chet dan an demna lantir nan shutdown hi an puang a ni.
Keishampat-a IPSA office-a press conference an neihnaah, state sorkar chu a rang lama buaina chhuak titawp tur leh, mipui vantlang himna ngaihtuah turin an phut tih an sawi. Jiribam district huamchhunga mi eng emaw zat rukbo leh an chin hriat loha awm mek te him taka chhuah an nih leh theih nana hma la turin an ti bawk.
Buaina chhuak avanga pawi sawi loten nunna an chan chu pawi an tih thu an sawi. State sorkar leh law enforcement ten an hnathawh tur ang an thawh ṭhat loh vang leh a hun taka an chet ṭhin loh vangin mi tam tak chu hlauhnain an khat a, thlamuang taka an awm leh thuai theih nan hma lak vat a ṭul a ni, an ti.
He shutdown-in a tum ber chu hetiang dinhmun a lo thlen a sorkarin a rang lama hma la a, remna leh muanna thlentir leh thuai tura an phutna lantirna a nih thu an sawi. Nawrh an huaihawt pawh hi sorkar chak zawk, mipuite nun chhanhim tur leh an dikna chanvo humhimsak theitu an mamawh hle tih an lantirna a ni tih an sawi bawk a ni.
Organisation hrang hrangte hian nawrh an huaihawt mek chu boruakin ziaawm lam a pan hma chu kalpui an tum thu leh, inbeihna leh buaina lo awm zel tur venna atana kalpui an nih thu an sawi bawk.
Jiribam-ah ruang pahnih chhar a ni
Manipur-a Jiribam-ah Thawhlehni khan Meitei mi pahnih ruang chu Jakuradhor police ten an chhar. An ruang chharte hi Laishram Barel Singh (61) leh Maibam Keshwo Singh (75) an ni tih an finfiah nghal bawk.
An pahnih hian Borobekra police station relief camp-a awm niin, Thawhṭannia buaina a thlen hnu khan an bo zui a ni. Meitei mi paruk dang chu chin hriat lohin an bo bawk a, chhungkaw khata mi niin an zingah hian naute, kum khat la tling lo pawh a tel.
Jiribam district-a Jakuradhor leh Borobekra huamchhung, Hmar ho chen tamna hmun Pherzawl district bul hnaiah Thawhṭanni chawhnu lam khan pawl pakhat leh security force te an inkap a ni. He inkahna hi CRPF post, Jakuradhor ami leh Borobekra police station te beih anih aṭanga thleng a nih thu police chuan an sawi. Tualchhung mite chuan inkahna thlen hma hian tu tih hriat loh ten Meitei ho inbenbelna hmuna in leh dawr an beih thu an sawi bawk.
Thawhṭannia inkahna a thlen hnu khan mi 13 bo an awm thu police-te chuan an sawi a, an zinga pathum chu Assam Rifles leh police ten an chhan chhuak tawh tih an tarlang.
