Assam : Congress worker leh BJP thlawptute inkarah buaina chhuak

Assam-ah nimin, November 13 khan by-election neihna, Samaguri-a Sholamari polling station-ah BJP leh Congress mi leh sate inkarah buaina nasa tak a chhuak.

Buaina chawk chhuaktu hi BJP lam nia sawi a ni a, polling booth station No.89 leh 90 naah lutin vote thlak kalpui a nih laiin an ti buai a ni. Congress worker tam tak an bei a, boruak pawh a ṭha lo hman hle nia sawi a ni.

Election official te leh security force te chuan buaina chhuak ti reh a, boruak a panngai leh theihna turin rang takin hma an la nghal a, he thil thleng hi chhui zui a ni dawn tih thuneitute chuan an sawi bawk.

By-election hi Assam constituency panga - Dholai (SC), Sidli (ST), Bongaigoan, Behali leh Samaguri-ah Nilaini khan neih a ni a, ruling leh opposition party-te an inbei nasa hle.

He inthlanah hian candidate 34 an awm. Zing dar 7 aṭanga tlai dar 5 thleng vote thlak hun hawn a ni a, vote thlakna tur polling station 1,078 a awm. Vote nei hi mi nuai 9 chuang an awm a ni. Webcasting station 592 siam niin, center 11 chu model polling booth atan puan a ni a, hmeichhe pual bikin 14 siam a ni bawk. Central armed force aṭangin company 15 ten venhim hna an thawk a, Assam police nen ṭangkawpin mi 1,500 vel bawr an duty a ni.

Samaguri constituency-ah hian Tanzil Hussain, Dhubri MP Rakibul Hussain fapa chu Congress aiawhin a ding a, BJP aṭangin Diplu Ranjan Sarma a ding ve thung. Behali-a ding, Jayanta Borah chuan ngaihven a hlawh hle a, BJP member hlui niin Congress tan a ding a ni. BJP aiawh Diganta Ghatowal bakah Lakhikanta Kurmi (CPI(ML) leh Ananta Gogoi (AAP) ten an chuh ve bawk.