Manipur-a Jiribam district-ah Inrinni khan inbeihna a thleng leh a, mi panga an thi. He thil thleng avang hian chief minister N Biren Singh chuan emergency meeting a ko.
Police-te chuan Inrinnia inbeihna thlenga thi zingah hian civil mi pakhat a tel niin an sawi. Jiribam deputy commisisoner, Krishna Kumar chuan armed group pahnihte hi Inrinni zing aṭangin an inkap tih a sawi.
Inbeina thleng thar leh avangin CM Singh chuan Inrinni vek khan a kaihhruai ṭangrual sorkara MLA leh minister-te chu CM Secretariat-ah emergency meeting a neihpui nghal. CM hian nimin khan govenror L. Acharya a hmu bawk a, an state dinhmunte a sawipui. Hemi hma, Inrinni zan khan CM leh Governor-te hi Raj Bhawan-ah minute 30 vel an lo inkawm tawh bawk a ni.
Kuki hel beihna do let turin anti-drone khawl changkang hmang
Manipur sorkar chuan tun hnaia Kuki helten drone leh rocket hmanga Meitei khua an beih avangin hemi do letna turin anti-drone sytem changkang,“Dronaam” chu ramri hrul ralmuang lo laiah an dah.
He drone changkang tak hi Manipur hmarlam Imphal West leh Kangpokpi district in a huam chhung hmun hrang hrangah dah a ni. “Dronaam” chu Imphal-a CRPF drone enkawltute kutah kar liam ta Inrinni khan dah a ni. Ramchhung siam chhuah integrated drone detection and interdiction system (IDD&IS) khawl thar hman hi sorkarin state chhung buaina tihreh tuma zau zawka hma a lak mekna zinga mi a ni.
Inspector General of Police (Intelligence) K Kabib chuan Meitei mipuite granade-a thuam drone hmanga beih ṭhin a nih avanga anti-drone khawl ṭha hman hi a nih thu a sawi. Civil miten beih an tawh ṭhin ti tawp turin police-te chuan ralthuam dang pawh an ngaihtuah mek tih a sawi bawk.
