Assam : Dan loa online sumdawnna chhui tur SIT din

Assam state-a dan loa online hmanga sumdaawnna kalpuia inbumna thleng chhui hna thawk turin Special Investigation Team (SIT) din a ni. Chief minister Himanta Biswa Sarma chuan a ṭul a nih chuan state sorkar-in Central Bureau of Investigation (CBI) koh luh a hreh lo tih kar liam ta Inrinni khan a puang bawk.

State chhungah illegal online trading hmanga inbumna a hluar avang leh investor tam takin pawisa tam tham tak an chan tawh avangin he thuthlukna hi siam a ni. Assam police chuan hemi kaihhnawihah mi 59 an man tawh bakah Special Investigation Team (SIT) 14 a din tawh. Heti chung hian inhnamhnawihna lian tak tak nei tam tak an la man lo a, chung zingah chuan choreographer Sumi Bora leh a pasal Tarkik Bora pawh an tel a ni.

CM chuan, “Assam police chuan heng case-te vil turin SIT a din. Enforcement Directorate leh Income Tax pawh pun an ni a, district level-ah dristrict police leh CID-in an chhui mek bawk a ni, tiin a sawi. He thila inhnamhnawih la bi bo mekte chungchang zawhna chhangin, Sarma chuan tumah hi police lakah rei tak an biru thei lo tiin, man an nih thuai tur thu a tarlang.

Director General of Police (DGP) GP Singh chuan police hmalakna te sawiin, district 14-a deposit scheme regulate lohte chu bitum niin, case 28 ziahluh tawh niin, mi 59 man an nih tawh thu a sawi. “Notice pek tawh hnu pawha thuneitute thawhpui ṭha duhlo mi 22 hnenah Lool Out Circulars (LOCs) pek an ni tawh a ni. Banning of Unregulated Deposit Schemes Act 2019 leh Indian Penal Code hnuaiah case-te hi ziahluh a ni,” tiin a sawi.

Chhuichian hna chak taka thawh a nih theih nan, SIT 14 din an ni tawh a, anni hi Assam CID vilna hnuaiah an thawk a ni. Hei bakah hian, a thluak bur bera rin laka Dibrugarh-a case an ziahluh tawh chu, chipchiar zawka chhui turin CID hnenah hlanchhawn a ni tawh bawk.

DGP chuan police pahnih chu unregulated deposit scheme-ah inhnamhnawihna an neih avangin an lakah disciplinary action lak a nih thu a puang. Lance Naik Saroj Deka chu a hna aṭanga ban a ni a, Inspector Jitumoni Deka erawh suspend a ni thung.

He inbumnaa a thluak bur ber leh a bultumtu bera puh Bishal Phukan chu man tawh niin, kar liam ta Inrinni khan judicial custody-ah dah a ni. Police-in ni thum an kawl hnuah, court-ah hruai a ni. Phukan-a case hi September 18-ah ngaihtuah leh a ni ang.

Phukan-a hi stock market investment hmanga return ṭha tak tak tiama mi za chuang buma puh a ni. Man a nih hma hian vaibelchhe tam tak investor-te a laksak hman nia rin a ni. Phukan-a hi dan chi hrang hrang tlawhchhana man a ni a, heng zingah hian Banning of Unregulated Deposit Scheme Act, 2019 pawh a tel.

Dibrugarg police chuan hemi case kaihhnawihah hian luxury car 4 - Fortuner, MG hector, KIA Seltos leh MG Astor-te an man tawh a ni.