Manipur sorkar chuan tun hnaia helpawlin Meitei khuaa drone hmang bomb an thlak chu chhui chiang turin member panga awmna high powered committee a din a, committee-ah hian army, state police leh paramilitary force-a officer-te an tel.
Committee hian drone-a puakthei thil dah a nih dan te, eng angin nge hna a thawh leh a hlauhawm theih dante zirchiang turin technical expert an ruai dawn a, hetiang hmanrua lo beih let dan tura hma lak tur pawh an ngaihtuah nghal dawn a ni. September 13, 2024 ah report hi Manipur Director General of Police (DGP) hnenah thehlut tura tih an ni.
Pathianni khan Imphal West-a Koutruk khua chu helpawlin drone hmangin an bei a, mi pahnih thiin hliam tuar 10 an awm bawk a, an zingah hian naupang, police leh reporter an tel a ni. He pawikhawihna hi Kuki helpawl tih nia puh a ni, high-tech drone hmangin Meitei khuaah hian Rocket Propelled Grenades (RPGs) an thlak niin an tarlang.
Pathiannia drone hmanga inbeihna a thlen hnuah, Thawhṭanni khan Senjam Chirang Maning Leikai khua chu drone hmang vekin beih a ni leh a, mi pathum an hliam. He khua hi Kangpokpi district ramri hnaiha awm a ni a, Pathiannia helpawlin an beih Kouturk khua aṭanga hnaite a ni.
Manipur police chuan Imphal West leh Kongpokpi district inrina te chu Pathianni aṭang khan uluk taka dap a ni a, Kangpokpi district-a Kangchup Ponlen area an dapna aṭangin ralthum eng emaw zat an man. Securiy force-ten ralthuam an man zingah hian 12-inch single-bore barrel rifle 10, improvised mortar leh improvised mortar barrel pakua, gelatin tlawn 20, detonator 30 bakah country-made rocket pahnih an tel. Kharam Vaiphei khuaah drone pakhat man niin, Kakching district-a Kakching Lamdong-ah self-loading rifle pahnih leh .32 pistol leh a magazine man tel a ni bawk.
BJP MLA-in central security force la chhuak turin ngen
Manipur BJP MLA, Rajkumar Imo Singh chuan an state-a central security force dahte chuan tualchhung buaina an titawp thei chuang lo a nih chuan la chhuak mai turin sorkar laipui a ngen.
Union home minister Amit Shah hnenah lehkha thawnin, Sagolband bial MLA chuan an state-a buaina thleng mek chu central security force-te chuan an thunun thei lo a, hei vang hian boruak muanawm a awm theihna atan state force-te chu mawhphurhna pe zawk mai tura a duh thu a sawi. Manipur-a centraly security force 60,000 dawn an awm chungin, buaina ti reh a, boruak muanawm siamna kawngah hlawhtlinna an nei lo a ni, a ti.
Singh chuan Union Home Minister chu Manipur aṭanga inlakhran duh, helpawlte nena sorkar laipuiin inkahhai puanna, SOO agreement a ziah pawh sut leh turin a ngen a, hei hian an state buaina a tizualkai zawk niin a sawi.
