Ruahmanna mumal awm loa pem lutte ram leilung fate tan a hlauhthawnawm : Congress leader

Meghalaya-a Congress party hruaitu, Manuel Badwar chuan ruahmanna mumal nei loa ram dang mi, Meghalaya state-a pem lut ṭhinte chuan a ram leilung fate dinhmun hlauhthawnawm takah a awm tir a ni, a ti.

Badwar chuan Meghalaya-ah hian ram leilung fa dik tak chu mi mtd 3 vel chauh an awm a, hei vang hian thununa awm lo leh ruahmanna mumal awm loa ram dang mi pem luh reng an nih chuan an chimral thuai thei dawn niin a sawi. Ram dang aṭanga pem lut, a bikin Bangladesh aṭanga lutte chungchangah state chuan dan felfai leh khauh tak a siam a ngai tih a sawi.

Congress hruaitu chuan Citizenship Amendment Act (CAA) pawh na taka sawiselin, he dan hian sakhaw behchhan hmangin dan loa luh tumte tan kawng a hawnsak a ni, a ti. State sorkar chu Meghalaya state humhim a, ram dang aṭanga pem lut turte tana ruahmanna felfai leh langtlang siam tura hma la tur leh, sorkar laipui kuta innghat lo turin a ngen bawk.