Arunachal : Fund hmang dik loa puh IAS officer lakah chargesheet theh lut

Central Bureau of Investigation (CBI) chuan IAS officer, Padma Jaiswal-i chu Arunachal Pradesh-a a awm lai in sorkar fund tichingpen a, a chhungte hminga ram leia puh a nih chungchangah a lakah chargesheet an theh lut.

2003-batch IAS officer, AGMUT cadre, Jaiswal hi tunah chuan Pondicherry-ah sawn a ni tawh a ni. Kum 2007-a Arunachal Pradesh-a West Kameng district deputy commisisoner a nih laiin, sorkar fund hi dik lo taka hmangah puh a ni. CBI hian Jaiswal-i bakah he thil thlen laia West Kameng-a finance and accounts officer Nor Bahadur Sonar leh cashier Rinchin Phuntsok te lakah thubuai hi a theh lut tel bawk.

CBI chuan Jaiswal-i hian a thuneihna hmang sualin, dan loin thil a ti a, sorkar account aṭangin a mimal thil atan pawisa a la chhuak a ni, a ti. Dik lo taka thil a tihnaah hian Sonar leh Phuntsok hian an thawhpui niin an sawi bawk. Sorkar account aṭangin Rs nuai 28 la chhuakin, hei hi Jaiswal-i chhungte hminga ram leina atan hman a nih thu an tarlang.