Indigenous Tribal Leaders' Forum (ITLF) chuan Inrinni liam ta khan mipui nen inrawn khawmna hun an hmannaah, Manipur tribal MLA-te chu Meitei sorkar hnuaiah an awm ve reng a rem loh thu an sawi.

ITLF chuan,"Kan MLA neihte hi Meitei sorkar, tribal-te thattu leh Meitei kalfawr pawl, Arambai Tenggol hnuaia thutiam la an nih avangin Meitei sorkar hnuaiah hian an awm ve reng kan remti lo a ni," an ti. Tribal MLA-te chu an kaihhruai mipuite duhdan a hma la tur leh, tribal-te tana ṭha tur a nih chuan Biren-a sorkar chu do ngam turin an duh a, a ṭul a nih chuan MLA an nihna aṭanga bang ngam turin an chah bawk a ni.

Hmalak zel dan tur an ngaihtuah naah ITLF chuan Mizoram sorkar rawn an tum thu an sawi. "Kan mite that a, kan Biak In leh kan bungraw tichhetu sorkar hnuaiah hian kan awm reng thei lo, anmahni kan hlat theih nan indaidanna ramri an siam a, Arambai Tenggol hmaah thutiam an la bawk a ni. Chuvangin sorkar laipuiin Delhi aṭanga min enkawl hi kan phut a ni" an ti.

ITLF chuan ramri hung tumna leh zalen taka inkalpawhna (FMR) tihtawp tumna chu an duh loh thu an sawi bawk. Nawrh huaihawt emaw lungawilohna lantir emaw chu a ṭul dan ang zela kalpui an tum thu sawiin, ITLF hmalakna chu mipuite'n tlhawp zel tura an duh thu an tarlang bawk. ITLF chuan Suspension of Operation (SoO) group-te chu Manipur sorkar nen inremna ziak lo tura an duh bakah an thil phut, Union Territory legislature nei, chu kal tlangpui turin an duh thu an sawi. "Zo United hmalakna hnuaiah SoO group leh kan MLA-te nen meeting neih thuai kan tum a ni" an ti a, Ministry of Home Affairs chu rorelna hran an phut chungchang a an hmalakna zawh fiah an tum thu an sawi bawk.