Manipur-ah dan hmanga rorelna a awm theih nan Kharge-a'n hma la turin Amit Shah a ngen

Congress party president, Mallikarjun Kharge chuan kar liam ta Inrinni khan Union Home Minister Amit Shah hnenah lehkha thawnin, Manipur buaina chungchanga Prime Minister ngawi reng leh hmalakna mumal awm lo chu North East mipuite dikna chanvo rahbehsakna a nih thu a sawi.

Kharge chuan Amit Shah hnenah hian dan hmanga rorelna leh democracy tundin a nih leh theih nan Manipur-ah a ṭul anga hma la thuai tura a duh thu a sawi tel bawk. "Manipur a buai aṭangin thla 9 a liam tawh a, buaina hian ziaawm lam aiin zual lam a pan telh telh zawk a ni" a ti.

January 24-a Kangla Fort, Imphal-a state roreltute inhmuh khawmna chungchang chu tarlang telin, heta tel MLA,MP leh Minister zinga tam tak chu Meitei kalfawr pawl, Arambai Tengngol te'n hming an ziah luihtir thu a sawi a, inhmuh khawmna hmun hi state leh central security force-te chuan an ven thu a sawi. 'Inhmuh khawmnaah hian Manipur Pradesh Congress Committee President leh MLA, Keisham Meghachandra chu nasa taka sawisak a ni" a ti a, he thil hi central security force-te awm rengna hmuna thleng a nih avangin mak a tih thu a sawi lang bawk. He thil thleng chungchangah hian Manipur CM, Biren Singh leh sorkar laipuia home ministry-te'n hmalakna an la nei lo a ni, a ti.

Prime Minister-in Manipur chungchanga ngawih a chuh reng chu zahthlak a tih thu Kharge chuan a sawi a, ngawih reng chu sorkar laipui bakah state a roreltute hmalak thiam dan tawk a ni tawh mai a ni, a ti. Tun thla ni 14 khan Bharat Jodo Nyay Yatra bulṭanna hmun a nih avangin Manipur a tlawh thu leh, a thil hmuh chu Rahul Gandhi-a'n June, 2023-a Manipur a tlawh ṭuma a hmuh dan nen a la danglam lo niin a sawi a, Manipur chu hnam anga ṭhen hran a ni, tiin a sawi. . Tharum thawhna tuartute tan chhawmdawlna leh dik taka rorel a nih theihna tura hmalakna mumal awm lo chuan Manipur-a administration tlukchhiatzia a tarlang a ni, tiin Congress President chuan a sawi.

Tu pawh sorkar se democracy leh a kalphungte humhim chu sorkar tih tur a nih thu sawiin, Kharge chuan, "Republic Day vawi 75-na kan hmang zo chiah a, Manipur hi India ram chhung a nih ang ngeiin state pawimawh a ni a, democracy leh dan hmanga rorelna tundin a nih leh theih nan hma la turin ka ngen che a ni" tiin a lehkhaah hian a tarlang.