Congress hruaitu Rahul Gandhi kaihhruai, Bharat Jodo Nyay Yatra chuan Thawhṭanni tlai dar 6 vel khan Nagaland lutin, Khuzama khuaa Khuzama tualzawlah khaw mite leh party worker-te'n an lo hmuak.
Nagaland-ah hian zan thum an chawl dawn a, ni 18-ah hian Assam an lut leh dawn a ni. Nagaland-a a cham chhung hian Rahul Gandhi hian district panga; Kohima, Tseminyu, Wokha, Zunheboto leh Mokokchung te tlawh a tum a, heng district-ahte hian kawngzawh huaihawt a tum a ni. Nimin khan Nagaland-a Viswema khua aṭangin Yatra hi a chhunzawm nghal a, Kohima-a World War II cemetery-ah pangpar a dah hmasa a, hemi hnu hian district danga a kal hmain High school junction-ah mipuite nena inkawmna hun a hmang leh bawk.
Rahul Gandhi hian Tseminyu leh Wokha a pan leh dawn a, hetah hian mipuite nena inkawmna hun a hmang leh bawk ang. Vawiin hian VK town leh Mokokchung town-ah te hun a hmang dawn a, Fazl Ali college te, Chchuyimlanga-a Gandhi Ashram te tlawh bawkin, Changtonya-ah mipuite hmaah thu a sawi dawn bawk a ni. Yatra hian Nagaland hi Ningani zinga chhuahsan hman tura ruahman a ni.
