Tripura : Bru raltlan awmna la nei lote Santirbazar-ah sawn dawn

Bru raltlan, inbenbelna tur nei loa la awm hnuhnung berte chu South Tripura district-a Santirbazar-ah dah an ni dawn niin sorkar official-te chuan an sawi. Santirbazar-ah hian Bru-te tan hian ram, hectare 30 pek a nih thu an tarlang. Official-te chuan,"Bru chhungkaw 54 te chu an awmna tura buatsaih hmunah hian an awm tawh a, tunah hian damdawi in sak mek hmunhmaah dah lailawk an ni. An in tur hi sak mek a ni a, chhungkaw 633 tan awmna nghet tur in sak a ni ang," tiin an sawi.

Bru IDP hruaitu, Bruno Msho chuan a tira sorkar nena an awmna tur chungchanga inremna ziak duh lote pawhin sorkar ruahmanna hi an pawm tak thu sawiin,"Inremna ang chuan chhungkaw 600 chuang he laia awm hmun nghet nei tura sawn tur an la ni. A tira thuneitute'n dah an tumna hmunah an kal duh lo a, hun rei tak chu inremna awm thei loin boruak a inmung a, tunah chuan awmna tura pek an nihna hi an duh tawh a ni. Chhungkaw 50 vel chuan helai hmun hi an pan tawh a, chhungkaw dang zawng hi in sak zawh hnuah a tahtawlin an kal ve leh ang," tiin a sawi. Bruno hian sorkar chuan vawi leh khata an vaia sawn nghal turin a tlin loh thu sawiin, an vaia sawn tura hun rei tak a ngaih loh a beisei thu a sawi bawk.

Santirbazar thleng tawh Bru chhungkaw 54 te hi January 13 khan Tripura Minister for Cooperation and Tribal Welfare, Shukla Charan Noatia chuan lo dawngsawngin, chhungkaw sawn chhuah ngai zawng zawngte February thla ral hmaa sawn chhuah theih an beisei thu a sawi. Bru raltlante awm hmun nghet pea sawn chhuah hi hmun 11-ah chuan zawh tawh a ni a, chhungkua zawng zawng hi kum hnih chhung atan pension anga Rs. 5,000 pek an nih bakah an eizawnna bul ṭanna tur atan Rs. nuai li fixed deposit-a dahsak vek an ni bawk a ni.