Manipur, Moreh-a police officer kap hlumtu man

Manipur police-te chuan nikum October 31-a police officer, Chingtham Anand kap hlumtu nia an sawi, Philips Khongsai chu Imphal aṭanga km 110 vela hla, Manipur leh Myanmar inrina bul khuaah an man thu an puang. Chingtham Anand hi Moreh helipad-a hnathawh lai endik tura a kal kah hlum a ni.

Police-te hian Chingtham Anand kap hlumtu bakah hian police-te silaia kaptu nia hriat, Hemkholal Mate chu an man tel thu sawiin, Mate hi K Moulsang khaw hotu leh Mate Tribe Union finance secretary ni lai niin an tarlang. Chingtham Anand kah hlum a nih hian Moreh-ah sipai tirh luh belh nghal a ni a, mahse, sipai tirh luh belhte hi kawng lakah helpawlin lo lambunin inkahna a thleng zui bawk.

Khongsai leh Mate te hi Thawhṭanni khan an awmna hriat chhuah a nih hnuah police-te hian um zuiin, man an nih hma hian police-te hi an lo kap niin an sawi. An tawmna in aṭanga an tlanchhiat zet hnuah Moreh police-te hian special commando unit tirin khaw thim hnuah an man thei ta a ni. Man an nih lai hian pistol pakhat leh a mu eng emaw zat bakah, Chinese hand grenade pakhat, AK mu sawm leh bomb tihpuahna hmanrua te an kawl a ni. Khongsai man a nih avang hian mi eng emaw zat chu Moreh police station-ah pung khawmin Khongsai hi chhuah turin an phut a, mipuite hian Khongsai-a kah hlum tak police officer, Chingtham khan pawisawi lo a man fo ṭhin niin an sawi.