Manipur tualchhung buaina kal zelah, Nilaini khan Bishnupur district-a PWD minister Konthoujam Govindas in chu mi ṭhenkhatin an suasam. State sorkar chu buaina chhuahna hmuna tualchhung mite venghim ṭha tawk loah an puh a ni.
Konthoujam Govindas hi BJP hruaitu niin, mipui thinrimin a in an suasam lai hian an chhungkua hi inah an awm lo. Minister in khawihtute zinga a tam zawk hi hmeichhia niin, Ningthoukhong area-a Minister in luhna gate an tihchhiat bakah tukverh, furniture leh electronic gadget-te an tichhe tel bawk.
Kar thum liam taa Meitei leh tribal, a bikin Kuki-te inkara buaina a chhuah hnuah tun ṭum hi Minister chenna in an khawih tel hmasakna ber a ni. Buaina chhuakah hian mi 70 chuangin nunna an chan tawh a, sipai leh paramilitary force-te chu buaina chhuak tur vengin state chhung hmun hrang hrangah duty tir an la ni.
Official-te chuan buaina chhuah hnuah helho kut aṭanga tualchhung mite venhimna turin sorkar chuan hma a la ṭha tawk lo a, chief minister N Biren Singh, Govindas leh BJP MLA dangte pawh buaina an tawh mek chungchangah ṭawngkam engmah nei lohah an puh bawk.
Thawhlehni zan khan Bishnupur district-a Toronglaobi-ah helhoin in ṭhenkhat an hal nia sawi a ni bawk a, Churachandpur district-a buaina chhuakah mi pakhat a thi nia sawi a ni a, mahse official report erawh a awm lo.
Eastern Army commander Lt Gen RP Kalita chuan Manipur tualchhung dinhmun enfiahin ni thum chamin Manipur hi a tlawh a, hnam hrang hrang aiawh leh civil society organisation hruaitute meeting a neihpui. A cham chhung hian Kangpokpi, Matripukhri, Churachandpur, Bishnupur, Yaingangpokpi leh Moreh-te a tlawh a, CM Singh leh senior official-te hmuin, an state dinhmunte a sawipui bawk a ni.
