Assam leh Meghalaya CM-ten ramri buaina hmun tlawh dawn

Assam leh Meghalaya chief minister - Himanta Biswa Sarma leh Conrad Sangma-te chuan June thla hian state pahnihte ramri buaina hmun an tlawh dawn.

State pahnih chief minister-te hian Assam lama Karbi Anglong district leh, Meghalaya lama West Jaintia Hills district-a an buaina lai an tlawh dawn a ni.

Ramri buaina chungchanga state pahnihten inbiakna an neih hnuah, he thutlukna hi chief minister pahnihte hian Nilainia Guwahati-a joint press conference an neihah an puang. Ramri chungchanga an inbiakna chu a hlawkthlak hle tih an sawi bawk.

Assam CM Sarma chuan, "June thlaah Meghalaya CM Conrad Sangma nen kan pahnihin Karbi Anglong leh West Jaintia Hills kan tlawhdun dawn a ni" a ti.

Meghalaya CM Sangma pawhin, "Assam - Meghalaya ramri buaina a reh theihna turin Assam CM nen inbiakna ṭha tak kan nei thei a ni" a ti a, "Assam CM leh sorkar laipui rorelna hi ka ring tawk a, hmun paruka ramri chungchanga inhmuhthiam lohna la awm pawh hi chinfel a nih thuai ka beisei," tiin a sawi.

Sarma leh Sangma-te hi July thlaah regional committee-te hnathawh dan thlirlet pahin an inhmu leh ang.