Nagaland-in 2023 inthlan kaihhnawihah thubuai 70 ziaklut

Nagaland-in kumin kumtira state assembly inthlan an neihah khan inthlan kaihhnawih thubuai 70 ziahluh a ni. State assembly inthlan hi February 28-ah neih a ni a, March 2-ah result puan a ni.

Inthlan kaihhnawih thubuai chungchang thlirletna meeting an neihah state police nodal office leh IGP (Range) Limasunep Jamir chuan report pein, mi 81 man an ni a, mi pasarih charge-sheet tawhin investigation kal lai case 60 a awm tih a sawi.

Review meeting hi Thawhṭanni khan Kohima-a chief election officer (CEO) office-ah neih a ni. CEO V Shashank Shekhar chuan meeting hi kaihruaiin, additional CEO R Kheshie, Joint CEO Awa Lorin leh Sharon Longcharu, deputy CEO Alila Chang leh assistant CEO Toshimere-te an tel.

CEO office chuan inthlan kaihhnawih thubuai ziahluhte hi inthlan zawh hnuah pawh an bawhzui reng tihchianna atana meeting hi buatsaih a nih thu a sawi. Election Commission of India (ECI) pawhin inthlan kaihhnawih thubuaite hi uluk takin a vil chhunzawm reng tih sawiin, inthlan lo la awm leh zel turah hetiang thubuai hi a tlem zel theih nan hma lak reng a ni, a ti.

Meeting-ah hian district tin chu hetiang case an neihte an bawhzui dan report kimchang thlatin thehlut ṭhin turin an rel. Report an thehlutte hi ECI leh CEO Nagaland office-in an lo ennawn ve leh ṭhin dawn a ni.