Meghalaya governor Satya Pal Malik chuan central-a BJP kaihhruai sorkarin sawisel hlawh tak, farm law thar pathum a siam duh lohna lantira ram chhunga loneituten nawrh an huaihawt hnua loneitu 600 vel an thihna chungchangah sorkar laipui chu na takin a dem. Loneitute a thlawp avangin Governor a nihna aṭanga ban hial pawh a inhuam thu a sawi bawk.
Pathiannia Jaipur-a Birla Auditorium-a Teja Foundation programme siama thu a sawiah,Malik chuan ui thi takngialah pawh sunna thu an sawi laiin, loneitute 600 vel thihna chuan sorkar laipui hotute rilru a khawih pha lo a ni, a ti. "Tun thlengin hetianga movement lian tham hi a la awm lo. Loneituten an thil phut an nawrnaah hian mi 600 velin nunna an chan tawh a ni. Ransa thiah pawh central lama hruaituten sunna thu an sawi a, mahse loneitute 600-te martar chungchangah hian eng thu mah an sawi lo a ni," tiin, "Maharashtra-a damdawi-ina kangmei chhuaka mi 5-7 vel thihna thlengah khan sorkar hotute chuan pawi an tih thu leh thi chhungte an tuarpui thu an sawi nghal mai a ni," a ti.
Governor chuan loneitute fapa tam tak chu sipaiah an lut a, hei vang hian an lungawi lohna hian armed force thleng pawhin a nghawng tel vek a ni, a ti. Dik lo taka rorelsak an nih chungchangah mipuite hi a la che chhuak ngei dawn a, "Loneitute na zawka an chet chhuah a ngai tur hi ka duh lo a ni," tiin a sawi.
Uttar Pradesh-a loneitu nawrh huaihawtte beih leh thihhna tawk hial an awm lai pawhin union minister zingah he hmun tlawh hi an awm lo tih a sawi bawk. "Delhi tan chauha roreltu awm hi eng nge a ṭangkaina," a ti.
Sorkar laipuiin Central Vista redevelopment project a kalpui mek pawh sawiselin, Malik chuan he project hi prime minister Narendra Modi chuan mimal takin a buaipui hle tih a sawi. "Parliament building thar sak ai chuan world-class college siam hi a ṭha zawk a ni, " a ti. Govenor hian loneitute chungchangah central-a BJP sorkar hi a hma pawhin a lo sawisel fo tawh a ni.
Loneitu pawl, Bharatiya Kisan Union (BKU) hruaitu Rakesh Tikait pawhin movement an kalpuinaa loneitu thi te chungchangah sorkar laipui aṭangin tawrhpuina thu chhakchhuak an awm lo tih a sawi. "Farm movement kalpuinaah loneitu 750 vel an thi tawh a, mahse sorkar laipui aṭangin an chhungte tawrhpuina thu engmah sawichhuah a ni lo. India rama loneitute chuan prime minister Narendra Modi chu loneitute tana PM ni ve loah an ngai tawh. PM hian loneitute hi a thliarhrang a ni," a ti.
Nikum November 26 aṭang khan sorkar laipuiin farm law pathum, Farmers` Produce Trade and Commerce (Promotion and Facilitation) Act, 2020; Farmers Empowerment and Protection) Agreement on Price Assurance and farm Services Act 2020 leh Essential Commodities (Amendment) Act, 2020 a siam duh lohna lantirin ram chhung hmun hrang hranga loneitute chuan nawrh an huaihawt tawh a ni. Ṭum eng emaw zat sorkar aiawhte nen inbe tawh mah se, tun thlengin inremna an la siam thei lo.
