CBI-in Assam CM hlui Saikia fapa an man

Central Bureau of Investigation (CBI) chuan Pathianni khan Assam chief minister hlui Hiteswar Saikia fap, Ashok Saikai chu loan, cheng nuai 9 a lak kaihhnawihah an man.

Official-te chuan a hmain Ashok Saikia hi court-ah inlan tura koh a ni a, mahse a inlan loh avangin non-bailable warrant tichhuakin man a ni tih an sawi.

CBI Guwahati team chuan Ashok Saikia hi thu an zawtfiah nghal a, nimin khan court-ah hruai a ni.

Ashok Saikia-a u, Congress hruaitu leh Assam Assembly-a leader of opposition ni mek, Debabrata Saikia chuan he case hi thil hlui tawh tak an chinfel tawh niin a sawi. Bank tih dik loh niin court-ah pawh engmah a hriattir lo tih a sawi. Ashok Saikia hi kum 1996 khan The Assam State Co-operative Agriculture and Rural Development Bank Ltd (ASCARD) aṭangin loan hi a la a, a hnuah ASCARD in a hriattir angin a loan pawh hi a rulhsak tih a sawi. Hetih laia ASCARD general manager in-charge pawhin October 28, 2015-a official letter a tihchhuahah ba rulh tur engmah a awm tawh lo thu pawh a tarlang vek a ni, a ti.

A bate a rulh tlak vek tawh chungin CBI team hi Pathianni khan an inah loan ba a neih thu an hrilh a, a hmain CBI emaw, court lam emaw aṭang pawhin hriattirna engmah a dawn loh thu a sawi. "CBI-in dik lo taka min puhna chhan hi ka hrethiam lo a, CBI leh state sorkar chauhin an hria ang," tiin a sawi a ni.