SC lawyer leh midangte laka Tripura Police chet dan dem

Tripura-a pawl hrang hrangte chuan Tripura police-ten Supreme Court lawyer leh midang eng emaw zat lakah social media-a an thu post avanga thubuai an siamsak chu an dem thu an sawi.

October 26-a Vishva Hindu Parishad (VHP)-ten Chamtilla-a rally an huaihawt ṭuma buaina chhuakah mosque pakhat suasamin, Muslim dawr pahnih hal a ni bawk. Hei bakah hian Rowa Bazar-ah Muslim dawr leh chenna in ṭhenkhat rawk an ni bawk nia sawi a ni.

Police-te chuan he thil thleng chungchangah buaina chawk chhuak leh boruak ṭha lo siam thei zawnga social media lama post a tam nia sawiin, mi 102-te chu thubuai an siamsak a, an zingah hian Supreme Court lawyer-te pawh an tel a ni.

Police-te thiltih dan hi eptu party, Congress leh CPI(M) te chuan Pathianni khan an dem thu an sawi a, anni bakah human rights pawl hrang hrang pawhin an sawisel bawk.

Congress chuan thubuai siamsakte hi sut leh nghal tura phutin, mosque leh Muslim-te chenna in suasam saktu VHP activist-te chu man hmasa turin police-te an phut. Tripura Human Rights Organisation (THRO) pawhin Supreme Court lawyer-te thubuai siamsak an nih chungchangah state sorkar chu an dem thu sawiin, democratic rights auchhuahpuitute hrek beh tumna a ni, an ti.