Manipur chief minister N Biren Singh chuan zirna siamṭhatna atan leh sorkar school infrastructure tihchangtlunna tura a kaihhruai sorkar 'School Fagathansi' (Lets improves schools) mission a siam chu a hawng.
‘School Fagathansi’ mission hnuaia state chhung hmun hrang hranga sorkar school 60 tihchangtlunna lungphum phumin, Chief Minister chuan video conferencing hmangin school pasarih official-te chu a kawm zui a ni. Chief Minister chuan sorkar mission tihlawhtling turin ‘School Fagathans Mission Management Committees' chu tih tak zeta hna thawk turin a ti a, thla thum chhunga hmasawnna thlen ngei turin a ti.
Biren Singh chuan state sorkar chuan state education system chu siamṭhat a tum tih sawiin, hemi kawnga pui tur hian sorkar school-a zirtirtute pawh inpe turin a chah. Zirtirtu aikal la ṭhinte pawh titawp nghal turin a ti bawk.
Zirtirtute chu an post-ah ṭheuh an awm ngei em tih finfiahna turin sorkar school tinah 'biometric attendance machine' dah dan ngaihtuah a ni dawn tih a sawi. State sorkarin 'School Fagathansi' mission a kalpuina chu zirna ṭha leh changtlung, infrastructure ṭha zawk a awm theihna tur te, sorkar school-a zirlai lut an pun theihna turte a nih tih a sawi.
State education minister, education department, zirtirtute leh mipuite chu sorkar hmalakna a hlawhtlin theihna tura theihtawp chhuahpui turin a sawm. CM chuan constituency 60-a model school tur thlana zirtirtu hna dil chu 2200 zet an tling tih leh heng model school hrang hrangah hian zirtirtu inpe tak tak an mamawh ang zat tur dah vek an ni dawn tih a sawi a; hmei rual hian zirtirtu lakte chu an post-naah hian kum thum tal an awm tur a ni, a ti. School tinah classroom, campus nuam tawk tak, furniture, out-door gynasium, mipa leh hmeichhe tan inthiarna hran, tui thianghlim in tur leh an mamawh dang, Right to Education norms-in a tarlante chu pek vek an ni dawn tih CM chuan a sawi a ni.
