Sikkim: SPYF-in nawrh huaihawt

Sikkim Progressive Youth Forum (SPYF) chuan tunhnaia Sikkim Democratic Front (SDF) MLA-te  Bharatiya Janata Party (BJP) leh Sikkim Krantikari Morcha party (SKM)-a an inlet chu an demna lantirin, nimin khan state pum huap nawrh an huaihawt. 

SPYF chuan MLA uirete chuan mipuite rinna an phatsan avangin MLA an nihna aṭanga bang tura an phut thu an sawi. Kar kal ta Inrinni-a Gangtok-a press conference an neihah, SPYF member Shankar Sharma chuan an state-a politics inlumletna thleng mekah, state mipuite duhdan leh ngaihdante enkan a ni, a ti. Democracy ramah chuan mipuite chu lal ber leh thiltithei ber an ni tiin, mipuite chuan ram tana ṭha nia an hriat chu an aiawhtu turin an thlang chhuak ṭhin a ni,  a ti. Mipuite chuan assembly inthlan neih zawh takah, SKM chu sorkarna chang turin an thlang tling a, eptu lama awm turin SDF chu an thlang tih a sawi. 

Mahse mipuiin an aiawhtu turte an thlanchhuah vek hnuah, legislator-te chuan anmahni thlang tlingtu mipuite rawn loin an uire kual a, hei hi mipuite thuneihna leh an democratic right palzutna leh beihna a ni, tiin Sharma chuan a sawi a ni. 

Inthlan buatsaih a hautak a, sum senso a tam bakah tha pawh sen a ngai nasa hle tih sawiin, Sharma chuan mipui aiawh tura thlante chuan mipuite duhdan chu an zahsak thei lo a nih chuan inthlan neih chuan awmzia a nei lo, a ti. Mipui aiawh turte chu tender emaw, auction emaw hmanga thlan mai tur a ni tiin, tuna MLA uirete chu Sikkim mipuite chuan eng kawng mahin an pawmzam thei lo a ni, a ti.