National People's Party (NPP) president leh Meghalaya Chief Minister ni bawk Conrad K Sangma chuan Thawhlehni khan national party-te chu na taka beiin hmarchhak mipuite duh dan leh sukthlek ngaihsak loah a puh.
Conrad K Sangma chuan national party-te chuan Delhi-a ṭhu chungin hmarchhak leh a bik takin an state tana ṭha leh ṭha lo turte chu an rel tih a sawi. National party ten hmarchhak laka an rilru put hmang chu thil pawm theih a ni lo, a ti.
Citizenship Amendment Bill chu a entirna chiang tak a nih thu sawiin national party-ten hmarchhak rilru puthmang an hriat thiam lohzia lantirna a nih thu a sawi.
Conrad chuan Congress pawh bei zuiin Congress chuan CAB pharh a nih lohna turin an dang tih an sawi a, "AICC zawhna ka zawh duh chu Assam-a an MP pakhat pawhin Prime Minister Narendra Modi hnenah ziakin CAB chungchang hi an thlen em?" tiin a sawi bawk.
Party pakhatin Look East policy an rawn kalpui a, pakhatin Act East an rawn ti leh a. Kum tam tak a liam hnu pawhin thlir tur leh hmalakna hmuh tur a awm lo a ni, a ti. National party-te chuan en leh thawh chu sawi mah se engmah danglamna a awm lo tih a sawi a ni. Hmarchhak mipuite chuan keimahnia ke kan pen ve a ṭul tawh a ni, tia sawiin ," Kan hmalam hun hi kan kutah a awm a ni", tiin a sawi. Kan hmalam hun chu Delhi kutah kan dah thei lo ang, tiin a sawi a ni.
Tunhma chuan national party-te chuan hmarchhak aṭangin thlawpna tam tak an dawng ṭhin a, mahse tunah chuan thil a danglam tawh ni, tia sawiin regional force lam mipuite chuan an hawi ṭan tih a sawi.
Hmarchhak pum chuan Delhi CAB dodal mah se Delhi chuan an ngaithla duh lo tih sawiin, regional force inpumkhatna chuan hmarchhak chu hmasawnna a thlen dawn a ni, a ti.
Thawhlehni khan Polo Ground-ah NPP kaihhruai MDA chuan public rally neiih he hunah hian MDA aiawha ding tur Jemino Mawthoh tana campaign-na hun an hmang a ni,
Mawthoh pawhin thu sawiin Congress chu mipuite a ni lo zawnga hruaiah a puh. Congress MP chu engmah ti loah puhin hma la chak loah a puh.
He hunah hian UDP president, Dr Donkupar Roy leh Deputy CM, Prestone Tynsong-te pawh an tel. MDA candidate tur Jemino Mawthoh hi United Democratic Party member a ni.
