Assam state Assembly chuan Zirtawpni kalta khan MLA leh Minister-te hlawh sanna tur bill pathum an pass a, an hlawh hi 50% a tihsan a ni dawn.
Assembly Speaker Hitendra Nath Goswami chuan a tlangpuiin Amenities and Facilities Committee in MLA-te hlawh a ennawn ṭhin a, mahse tun ṭumah hian a vawikhatna atan chief secretary PP Varma kaihhruaina hnuaiah Pay Committee in hlawh hi an ennawn thu a sawi.
Assembly in bill pathum a pass hmang hian April 1 aṭang khan Assembly Speaker, deputy speaker, chief minister, minister zawng zawng, opposition leader, lawmaker dangte leh ex-MLA-te pension hlawh chu san a ni dawn a ni.
Speaker thlakhat hlawh hi cheng 80, 000 aṭangin nuai 1.2-ah san a ni dawn a, dy. speaker hlawh hi cheng 75, 000 aṭangin nuai khatah san a ni dawn bawk a, 50% leh 33% in pun a ni. Heng bakah hian allowance dang an la dawng bawk ang.
Chief minister hlawh pawh cheng 90, 000 aṭangin nuai 1.3-ah tihsan a ni dawn a, hei bakah hian allowance category pahnih aṭangin 17, 000 ni ṭhin kha 34,000 a dawng tawh dawn bawk a, a hlawh lak zawng zawng chu nuai 1.64 a ni dawn a ni.Cabinet minister leh opposition leader-te hlawh pawh cheng 80,000 aṭangin cheng nuai 1.1-ah tihsan a ni dawn a, allowance 15, 000 an dawn ṭhin pawh 30, 000-ah tihsan a ni bawk.
Minister of state in cheng 75, 000 an lak ṭhin chu cheng nuai khatah san a ni bawk a, hemi bakah hian allowance dang dawn tur an la nei bawk a ni.
Dy. Minister hlawh pawh cheng 70, 000 aṭangin 95, 000-ah san a ni dawn a, allowance an dawn ṭhin pawh tihpun a ni bawk ang.
Ex-MLA-te pension hlawh leh an allowance-te pawh tihpun a ni dawn bawk.
