Sorkar laipuia Ministry of Road Transport & Highways (MoRTH), Manipur sorkar hnuaia Transport Department leh International Centre for Automotive Technology (ICAT) te chuan Imphal East district-ah Inspection and Certification (I&C) centre dinna turin inremna an siam. He centre hi kawngpui himna leh Manipur-a lirthei hman laite fitness standard siamṭhatna tura duan a ni.

Centre hi Lamlai Assembly Constituency-a Teramakhong, Village No. 76-Tellou ah din a ni a, Rs vbc 14.25 senga sak tur niin, a sakna tur sum hi MoRTH-in a tum dawn a ni. Centre-ah hian two-lane automated testing setup (1 HMV & 1 LMV) a awm dawn a, lirthei tlan dan tih changtlun, eco-friendly practice tih hmasawn, ram himna atana dan zawm ṭhat te chu a thil tum ber a ni ang.

He hmalakna hi September 12, 2023 a sorkar laipui thuchhuah zulzuia siam niin, sumdawnna atana hman lirthei leh Light Motor Vehicles (LMV) te Automated Testing Stations (ATS) kaltlanga endik vek tura tih a ni. Manipur-ah hian facility an neih loh avangin District Transport Officer (DTO) chuan certificate hi a pechhuak ṭhin.

I&C centre siam turah hian automated system changtlung zawk hman a ni dawn a, lirthei brake a him tawk leh tawk loh, emission level, headlight alignment, suspension performance, leh chassis dinhmunte pawh a endik thei dawn a ni. Thuneitute chuan endikna langtlang zawka kalpui, kawnga tawhsual tawh a tihtlem dawn bakah, boruak quality-ah a puih an beisei.