Kum 7 chhungin hnathawk nghet 20,000 dawn la tawh : Ṭripura CM

Tripura chief minister Manik Saha chuan Nilaini khan thuchhuah siamin, BJP sorkarna hnuaiah department hrang hrangah kum sarih chhungin hnathawk nghet 19,742 lak an ni tawh tih a sawi. He thu hi junior engineer lak thar mi 184-te hnena appointment letter a hlannaah a sawi.

CM chuan engineer lak tharte chu tunlai thiamna changkang zawk hmang ṭangkai turin a fuih a, technology thar ber ber zingah AI leh 5G te pawh ṭha zawka hnathawh a nih theihna tura hmang tura chahin, tunlai thiamna hmanga insak a pawimawh thute a sawilang bawk.

Saha chuan BJP sorkarna hnuaiah mi 19,742 te chu sorkar department hrang hrangah a ngheta thawk tura lak an ni tawh tih sawiin, contract leh outsourcing mode-in hna 8,000 siam a ni tih a sawi bawk. Eizawnna siam chu sorkar thil tum a nih thu sawiin, ṭhalaite chu mahni inrintawkna nei tura siam an tum tih a tarlang.

State chhunga Self Help Group (SHG) awm zat chu kum 2018-a 4,000 aṭangin kum 2024-ah 56,000-ah a pung a, mi sang tam tak eizawnna a siamsak tih Chief Minister chuan a sawi bawk. Infrastructure hmasawnna atana sorkar hma lakna pawh sawiin, Tripura Gross State Domestic Product (GDSP) tih chakna atan Rs vbc 7,000 ruahman a ni, tiin CM chuan a sawi.