Tripura : MW 185 hydrokinetic power project thawhna tur hmun 10 ruat

Tripura-a renewable energy tihpun leh, electric supply khaihlak awm lo tura hmalaknaah state sorkar chuan Hydrokinetic Turbine Technology hmanga power MW 185 siamchhuahna tur lui hmun 10 a ruat tawh niin power minister Ratan Lal Nath chuan a puang.

Hydrokinetic project thawhna atana lui 10 tarlan zingah; Lakhipur Ampi-a Chakmaghat, Maharani, Dumboor, Natunbazar, Kalsi, Manu, Kulai, Feni, Dhalai, leh Sangan-te a tel a, thla thar lamah hna thawh ṭan tum a ni.

Agartala-a Banamalipur-a bhoomi pujan ceremony-a thu a sawiah, Nath chuan he hmalakna hi electric mamawhna sang zel phuhrukna tura lui hman ṭangkaina tur a nih thu a sawi. Hmasawnna atan power supply a pawimawh tih tarlangin, state-ah darkar 23 leh minute 54 chhung power pek chhuah niin, kum 2018 hma lama electric hmangtu zat chu nuai 7.21 aṭangin nuai 10.57-ah an pung tawh a; tun dinhmunah MW 378 mamawh a nih thu leh, kum 2031-a MW 650 phuhruk turin technology thar hman a pawimawh hle a ni, a ti.

Sorkar-in renewable energy siam kawnga a hmalaknate tarlangin, PM Surya Ghar Muft Bijli Yojana hnuaiah solar panel KW 2 hmangin chhungkaw nuai 5 velin nitin MW 1,000 an siam chhuak a, solar building 2,000-ah solar power system dah a ni tih Nath chuan a sawi bawk.