Mizo film industry-in hma a sawn chho zel a, film thar ṭha leh hmuhnawm tak tak pawh a chhuak thar ta nual mai. Film chhuak tur nghahhlelh awm tak tak pawh an awm mek bawk.
Tun hnaia Mizo film siam tam zawk hi movie streaming app, Lersia Play aṭanga pek chhuah ṭhin niin, Mizo film tam tak en turin a awm tawh.
August thla chhunga Lersia Play aṭanga film leitu ngah ber chu 'Lalpa a ṭha' tih a ni. He film hi July 20, 2024-ah streaming app-ah hian tih chhuah a ni a, Kristian film niin director hi Malsawma Fanai (M_Space) a ni. Assistant director Mafaki Fanai leh cinematographer Merky Khawngaiha a ni. A changtute hi Siami Chawngthu, Diktei, Pekpeka, Lucy L Pachuau, Msa Chinzah leh Awmpuitea te an ni. Pathiana innghat tlat, thingtlang lama unau pahnihte an dinhmunin a zir loh avanga khawpuia inhlawh tura awmten hmuhsitna leh hrehawmna nasa tak kara Pathian hnathawh ropui tak an hmuh dan chungchang a ni.
August 29-a tlangzarh, 'Ka nihna a ni lo' tih chu August thla chhunga film hralh chhuah tam pahnihna a rawn ni thei. He film hi HIV/AIDS inzirtirna lam hawi a ni a, kan milar rualte an inlan. Czi Ralte leh zaithiam Zoramchhani te buaipui niin, direcotr hi Zonunmawia Fanai a ni a, Mawitea (RDS Shots) chu director of photography a ni thung.
Mizo film lama kan hmuh ngai loh tak, thiltihtheihna danglam tak nei, 'Benga' chu Lersia Play top chart August-a pathumna a ni. He film hi crime leh action inpawlh niin, David Ruata direct leh ziah a ni a, Lada Picture chu producer a ni
August thla chhunga mipuite film lei tam zual panga zingah hian June 28-a tih chhuah, 'Kat leh Daifim' leh, May 11-a tlangzarh, 'Kan Chhungkua' tih chu an lang bawk.
