Praise On 2024 hlanna hun hmang

SYNFO leh Central Kristian Ṭhalai Pawl (CKṬP) in Praise On 2024 (Solo Competition) an buatsaih tur hlanna chu nizan, September 3 zan khan Upper Republic Kohhran Hall-ah neih a ni.

Nizana hun hman C. Lalawmpuii'n a kaihruai a, CKṬP leader Rev. Dr. Rosiamliana Tochhawng chuan hunserh a hmang. Organising secrtary Tual Upa T.C. Lalremsiama chuan report pek leh inhmelhriattirna neiin, Praise On neih tur chu Synod Moderator, Rev. R. Vanlalnghaka chuan Pathian hnenah a hlan. Organising chairman John Lalhruaitluanga chuan lawmthu sawina hun a hmang a, Synod Secretary (Sr) Rev P.B. Mankima chuan malsawmnain a khar a ni. Nizana hun hmanah hian Mizoram Synod Choir te an zai bawk.

Praise On 2024 hi September 3 - November 22 chhunga neih a ni dawn a, lawmman hi pakhatnain Rs 1,20,000 niin, pahnihna Rs 70,000, pathumna Rs 50,000 bakah Top 5-in Rs 15,000 leh Top 10-in Rs 10,000 an dawng dawn a ni. Audition hi hmun ngaah neih a ni dawn a, September 6-ah Champhai Venglai Kohhran, September 10-ah New Serchhip Kohhran, September 14-ah Kolasib Hmar Veng Kohhran, September 21-ah Lunglei Bazar Veng Kohhran leh September 25-28 ah Tuikual Kohhran, Aizawlah neih a ni ang.