TV sitcom smash hit, 'Friends' changtu zinga mi, Matthew Perry, Chandler Bing tia hriat lar chu kum 54 mi niin Inrinni liam ta khan a thi.

Matthew Perry hi Los Angeles-a a ina hot-tub/jacuzzi ah nikhaw hre loa hmuh a ni a, a hmu hmasate hian chhan tumin theihtawp chhuah mah se chhan tlak a lo awm tawh lo niin law enforcement lam chuan an sawi.

'Friends' sitcom hi kum 20 chhung, kum 1994 - 2004 khan tihchhuah a ni a, a final episode phei chu US-ah mi mtd 52.5 zetin enin, kum 2000 chhoa TV episode entu ngah ber a ni. Kum 2017 khan reunion an lo nei tawh bawk. Perry-a character, Chandler Bing hi a hlimawmin, fiamthu nena mi ṭawng el, sarcasm thiam tak a ni a, lawm a hlawhin Mizoram thlengin Chandler-a fan pawh kan tam hle. Mahse a hlawhtlin chhoh hnuah, Perry hian painkiller leh zu a addict avangin a buai chho a, vawi tam tak tak rehabilitation clinics pawh a pan a ni.

Perry hian nikuma a lehkhabu tihchhuah, "Friends, Lovers and the Big Terrible Thing,"-ah ruihhlo leh zu ngawlveina aṭanga tal chhuak tura a beih nasat dan leh, a taksa thlenga a nghawng dan te, sum maktaduai tel a sen thute a ziak lang. He lehkhabu hi ruihhlo nghei tum harsatna tawk, 'sufferer' zawng zawng tan a hlan tih pawh a ziak lang bawk. Nikum October thlaa New York Times-in a kawmnaah, Perry hian thla 18 chhung ruihhlo lak aṭanga a fihlim tawh thu hi a sawi.

Perry hi 'Friends' bakah 'Fools Rush In' leh 'The Whole Nine Yards' ah pawh a chang a, Emmy Awards-ah nomination panga a hmu a, mahse, award erawh a dawng ta lo.