Mystical Mizoram Ṭhazual Lengzem chart-ah Keimah Senes, Tlangval Tlumtea X Lil Me 'Thlabial zan' chu pakhatna a ni a, chart hmasa lamah khan pathumna niin tunah chuan pakhatnaah a rawn ni ta a ni.
Keimah Senes, Tlangval Tlumtea X Lil Me
Keimah Senes, Tlangval Tlumtea X Lil Me-te thawkho hian hla an la tichhuak tam lo, chuti chung chuan an hla tihchhuah apiang a 'hit' a, tuna an hla tihchhuah thar ber pawh hi a hit chho leh mek a, thla khat chhung vel lekin YouTube lamah thlirtu nuai chuang an nei leh der tawh.
Ṭhazual Award dawng mai thei dinhmuna ding mek Keimah Senes, Tlangval Tlumtea X Lil Me-te hla tihchhuah dang pahnih phei chuan YouTube lamah thlirtu maktaduai an nei tling ve ve tawh a, tuna an hla thar a 'hit' leh viau pawh hi a mak loa, chart-a ro an rel pawh hi tumahin mak an tih a rinawm lo.
Pahnihna Marina Varte, pathumna Manuna
Marina Vanhriatpuii Varte chuan Mizo rilrem zawng tak hla a tihchhuah 'Suakpuivungi Ruah Varpui Bang Theh' chu chart-ah pahnihna a nihpui der tawh. Chart leha a dinhmun tur hriat a chakawm tawh viau.
Pathumna chu Manuna 'Thinlung hliam' kha niin pangana aṭangin top 3-ah a rawn invawrh a ni.
Chart a 'hot' chho zel
Ṭhazual chart-a langte an ṭha chho zel a, tunkar chart-a langte pawh an ṭha leh viau.Zaii Hauchhum 'Nunruak aurawl' chu palina a ni ta a, Feli Fanai leh Manuna chuan 'Tuaktharte' hmangin top 5 an khar.
R Lalruatkima, Ngurthan-sanga, Jaui, DJ Lalvenhimi leh Apuii Chhangte-te chu chart top 10-ah an lang bawk.
