7th Annual Ṭhazual Award : Best Artist Award tute'n nge dawng dawn?

Ṭhazual Award vawi sarihna chu Ningani leh Zirtawpni zanah hian sem a ni dawn ta. Award ngaihhlut Best Artist award dawng thei turte an ṭha hlawm a, bihchian tham an ni.

Best Artist hi Gospel leh Lengzem category-ah mipa leh hmeichhe category a awm hrang ve ve a, mi pali laiin he award hlu tak hi an dawng thei tihna a nih chu.

Gospel artist mipa zinga dawng thei turte
Sawmte Chhangte kan hria. Ṭhazual award vawi eng emaw zat lo dawng tawhtu hian kumin hian award a dawn belh leh thei dawn em tih kan hre thuai ang. Chutih rualin a elpui turte erawh an theuneu lo khawp mai.

'Praise on' star Zorinsanga leh Amtea te ho nen an inel dawn a, tin, tunlaia Fakna hla lar tak 'Min chhungkhat la' tih satu Nghaktea Fanai leh 'Sulam lenmawi' satu C. Lalremruata-te pawh he category-ah hian an la awm. Award dawng thei tur hi hriatthiam a har a, Ningani zanah erawh thil engkim a chiang tawh dawn a ni.

Best female artist Gospel, Category ngaihnawm ber tur?
MDM hian Gospel artist hmeichhia an nei ṭha a, tunlaia zaithiam sawm hlawh ber ber an kawl nual. Chung zingah chuan Hlimhlimi, Maruati, Stacy Punte, Cindy Lalthanpuii leh Arini-te chu award dawng thei tura thlan chhuahte an ni a, he category hi hriatthiam a har hial zawk! Tupawh hian award hi dawng se a awm vek mai.

Maruati hian kum hnih a zawnin he award hi a hum haw tawh a, mahse kuminah pawh hian Gospel artist hmeichhe zingah chuan huhang ngah ber pawl a la ni phak tho a, he award ngaihhlutawm hi a hum haw leh thei dawn em tih hriat a chakawm tawh. Chutih rual chuan he category-a a awmpui, nikum Ṭhazual Award lama Best new artist award dawngtu Stacy Punte te, tunhnaia mini album tichhuaktu Hlimhlimi, zaithiam sawm hlawh Arini leh Cindy-te nen an awm ho miau a, he huang hi huang ngaihnawm ber pawl a ni dawn tih a chiang.

Lengzem lamah mipa lam an 'hot'
Best male artist Lengzem award dawng thei turte chu Benjamin Sum, JT Production, Kimkima, Manuna leh Mathlenga-te an ni.

Manuna leh Mathlenga chu kan hre chiang a, kum eng emaw zat chhung Zoram rimawi khawvela Zofate min awi tawhtu, mipa zaithiam kan neih ṭhat ber zinga mi an ni reng.

Kimkima hian kum 2018 leh 2019 khan he award hi a lo dawng tawh a, kuminah hian a dawng leh thei dawn em? Hriat a chakawm tawh. Chutihrual chuan Myanmar Idol star Benjamin Sum hi tunhnaiah a rawn invawrh a, zaia sawmtu an tamin a lar vanglai tak a ni. JT Production a la awm cheu! Hla lungkuai tak tak, Mizote rilrem zawng tak a hla phuah thiam taka sa ṭhin JT-a pawh hi award dawng turin a khan viau. He category hi category ngaihven hlawh zual tur a ni ngei ang.

Lengzem hmeichhe lam an theuneu lo
Live performance video million views neihpui rang ber record siamtu Zaii Hauchhum, YouTube lama a video dah chhuah apiang a hit emaw tih mai tur Jenny Jathang, tunlaia zaithiam huhang ngah ber pawl Jaui, zaithiam leh hla phuah thiam, Mizo hmeichhe blues singer kan neih tlemte zinga mi Grace 10:45 leh a hla zawng zawng deuhthaw hit-pui zel thei Essy-te inelna tur category hi a theuneu lo. Tupawh hian he award hi dawng se a awm em em vek maiin a hriat.