Zendaya leh Anya Taylor-Joy-te chu thlaleha neih tur Council of Fashion Designers of America (CFDA) Fashion Awards-ah chawimawi an ni dawn.

Tunlaia film lar tak 'Dune' star Zendaya leh NETFLIX series hit ber pawl 'The Queen's Gambit' star Anya Taylor-Joy, kum 25 mi ve vete chu November 10-a The Pool + The Grill, New York Seagram Building-a neih tur CFDA Fashion Awards-ah chawimawi an ni dawn. Zendaya hi Fashion Icon-ah puan a ni dawn a, Anya Taylor hi Face of the Year-ah puan a ni thung ang.

'Greatest Showman' Zendaya hian August 2015 khan a shoe collection Daya chu bul a lo ṭan tawh a, fashion brand lar tak taka ambassador-ah puan ni bawkin, chung zingah chuan Tommy Hilfiger, Lancome, Valentino, leh Bulgari-te pawh a tel. Naomi Campbell, Beyonce, Rihanna leh Lady Gaga-te hniakhnung zuiin Fashion Icon award hi a dawng dawn a ni.

Zendaya hi nikum lamah khan Green Carpet Fashion Awards-ah 2020 Visionary Award hlan a lo ni tawh bawk.

Actress leh model lar Anya pawh hi Viktor & Rolf leh Tiffany & Co ambassador a ni a, fashion magazine lar eng emaw zat cover-ah a lang tawh.

CFDA hi trade association niin American fashion leh accessory designer 450 vel zet telna pawl a ni a, CFDA Fashion Awards hi kumtinin an buatsaih ṭhin a ni. Khawvel economy-a fashion-in nghawng ṭha tak a neih chu an pawl tum ber a ni a, kum 1962-a din daih tawh kha niin kum 1981 aṭang khan kumtinin CFDA Fashion Awards hi an sem ṭhin a ni.