‘No Time To Die’-in $mtd 500 lalut tling ṭep

MGM/Eon/Universal film 'No Time To Die' chuan International Box Office aṭangin $maktaduai 358 a lalut tling tawh a, North America Box Office aṭanga a sum lakluh nen chuan $mtd 474 a lalut tling tawh.

Tun kar tawp lo awm tur chhung hian James Bond film 25-na hian $mtd 500 a lakluh tlin hman rin a ni a, chutiang chu a tithei a nih chuan Hollywood film zinga kumin chhunga sum lalut tam ber pahnihna a ni thei dawn.

Tunah hian Hollywood film bikah chuan 'F9' bakah 'Godzilla Vs Kong'-te a la pha loa, kumin chhunga film tlangzarh sum lalut tam parukna a ni mek bawk.

Tun kartawpah hian $mtd 500 hi a lalut tling a nih chuan 'Godzilla Vs Kong' aiin asum lakluh a tam tawh zawk dawn a ni.

Kar laklawhah pawh UK lamah chuan a che ṭha hle a, UK-ah chuan $mtd 96.5 a lalut tling tawh a, Universal film zinga UK-a hlawhtling ber a ni. Hong Kong, Ukraine, Argentina, Paraguay leh Egypt-ah pawh ‘No Time To Die’ hi 007 film sum lalut tam ber a ni der tawh.

October 29 hian China-ah tihchhuah a ni ve dawn chauh a, November 11-ah Australia-ah tihhchhuah a ni dawn bawk. 'No Time to Die' hi a la 'hit' chho zel dawn niin a lang.