American market research company 'The NPD Group' chuan kumin chhung, May thla thlenga video games hralh kal ber chu Call of Duty: Black Ops: Cold War a nih thu an tarlang.
Call of Duty a hit chhunzawm zel
Kum 10 liam ta chhunga US-a game an hralh kal zual 10 list nikuma an tihchhuahah khan pasarih lai chu Call of Duty game a ni, kuminah pawh Call of Duty bawk hralh a kal leh.
Call of Duty: Black Ops: Cold War hi nikum November-a tlangzarh kha a ni a, 'The NPD Group' hian nikum December-ah khan nikum chhunga game hralh kal berah an puang nghal der tawh. Kuminah pawh hralh a la kal chhunzawm zel a ni.
Activision Blizzard (Corp)-in an tlangzarh Call of Duty: Black Ops: Cold War hi a game franchise 17-na a ni tawh a, tunah hian PlayStation 4, PlayStation 5, Windows, Xbox One leh Xbox Series X/S hmangtein a khelh theih.
He game hi tlangzarh a nih tirh aṭang khan game review-tute'n an fak hlawm hle a, Game Informer phei chuan 8.75/10 rating a pe hial.
Tlangzarh a nih aṭanga kar ruk chhung lekin $maktaduai 678 a hmu chhuak hman a ni. Thla khat chhung velin he game hi digital sales aṭang ringawta copy mtd 5.7 vel an hralh hman kha a ni a, gamer-te'n he game hi an ngaihna hle tih a chiang.
Capcom game 'Resident Evil: Village'-in lawm a hlawh
'Resident Evil 7: Biohazard' (2017) chhunzawmna 'Resident Evil: Village' hi May 7-a an tlangzarh chauh kha ni mah se kumin chhunga game hralh kal ber dawttu a ni nghal der tawh.
Tlangzarh a nih aṭanga ni thum chhung lekin copy maktaduai thum chuang an thawn chhuak nghal a, Resident Evil game series-a game an hralh chak ber pathumna a ni. Thla hmasa chhung khan he game hi game hralh kal ber a ni bawk.
Game hralh kal zual dangte chu
Kumin chhunga game hralh kal pathumna chu Sony (Corp) game 'MLB: The Show 21' a ni a, baseball video game niin Mizo zingah erawh a tlak nat vak a rinawm loh.
'Super Mario 3D World' chu palina a ni a, 'Monster Hunter: Rise' chu pangana a ni thung.
Kumin chhunga video game hralh kal zual 10 te:-
1 Call of Duty: Black Ops: Cold War
2 Resident Evil: Village
3 MLB: The Show 21
4 Super Mario 3D World
5 Monster Hunter: Rise
6 Marvel's Spider-Man: Miles Morales
7 Outriders
8 Mario Kart 8
9 Assassin's Creed: Valhalla
10 Minecraft
The NPD Group: Khawvela market research company lian pariatna ni pha an ni a, ram 20 chuangah inzar pharhin company hrang hrangin an bungraw hralh dan tehtu, an hralh zat vel tur lo rinlawk tirtu atan leh an hmasawnna tur atantea an rawn ṭhin an ni.
