BLACKPINK The Movie tlangzarh ni tur a hriat ta

K-Pop group lar Blackpink chuan Ningani khan August thlaa an tlangzarh tur 'Blackpink The Movie' tlangzarh ni tur an puangzarh a, August 4 hian an tlangzarh dawn.

'Ice Cream' hitmaker-te hian an band kum nga tlin lawmna peng pakhat atan 'Blackpink The Movie' hi an tlangzarh dawn a, an project '4+1 Project' peng pakhat tur niin ram 100 chuangah theatre-a en theih turin tlangzarh an tum.

An documentary hmasa 'Blackpink- Light Up the Sky' kha chu streaming platform lamah an tlangzarh a, tuna an tlangzarh thar tur erawh hi chu screen lianah a en theih dawn a nih hmel. Instagram lamah chuan tlangzarh hun tur an puanzarhnaah hian "Get ready for THE MOVIE in ScreenX, 4DX, 4DX Screen" tih an ziak tel a ni.

Ni thum liam taah khan an 5th Anniversary Annoncement video an tihchhuak bawk a, Blink tan chuan August thla hi a nghahhlelhawm zek zek tawh khawp ang.

Hetihlai hian nikum June thla tawp dawna an hla tihchhuah 'How You Like That' chuan tunhnai lawk khan YouTube-ah thlirtu maktaduai 900 a nei tling a, kum khat em pawh a tlin hmain hetiang zat thlirtu hi a nei der tawh. An hla eng emaw zat phei chuan thlirtu tluklehdingawn a nei tling tawh a ni.