Samajwadi Party president leh Uttar Pradesh chief minister hlui, Akhilesh Yadav chuan central-a rorellai, BJP chu rural employment scheme MNREGA tana sum dahte tihniam zel leh, scheme hming a thlak pawh thingtlang mite inhlawhna tur scheme siam nuaibo a tumna niin a puh.

Akhilesh Yadav chuan BJP thil tum chu MNREGA hming thlak ringawt ni loin, scheme nuaibo a ni a ti a, rorellai party chuan thingtlang mite eizawnna an neih chu an ngai thei lo a ni, a ti.

Congress party leh eptu party dangte chuan BJP-in Mahatma Gandhi National Rural Employment Guarantee Act (MGNREGA) thlakna atana Viksit Bharat Guarantee for Rozgar and Ajeevika Mission (Gramin) (VB-G RAM G), 2025 a siam chu an lo sawisel fo tawh a ni.

Yadav chuan X-ah MGNREGA hming thlak chuan eng nge hlawkna a neih tia zawtin, hei h BJP in a ruka rural employment scheme nuaibo tura a ruahmanna niin a sawi. 'BJP sorkar chuan MGNREGA budget chu a tlem thei ang berin a tihniam a, hemi rual hian state-te chu anmahni sum hmang turin a nawr leh bawk si a ni. Sum lama harsatna nei state-te tan chuan budget dah belh hi thil theh loh a ni," tiin a sawi. Hetiang zel a nih chuan state-e chu he scheme titawp tura nawr an la ni mai dawn a ni, a ti.

SP hruaitu chuan BJP kaihhruai sorkarin urban category hnuaia gram sabha tam tak a dah chu a sawisel bawk a, hei vang hian MGNREGA kaihhnawiha sum an hmuhna tur an hloh phah niin a tarlang.

Hetih lai hian Uttar Pradesh chief minister Yogi Adityanath chuan VB GRAM G law an sawisel chungchangah Congress leh INDIA bloc chu na takin a bei let ve bawk. Kum tam tak ram hausakna lo tichingpen a, mi tam tak retheihna khura hluk luttute chuan BJP sorkarin thingtlang mite thuam chakna tur, langtlang taka kalpui tur a duan chu an sawisel a ni, a ti. VB-Gram G Act chu India rama hnathawktu, loneitu leh thingtlang lam tihhmsawnna tur thil chhinchhiah tlak a ni dawn tiin, Uttar Pradesh sorkar chuan a thlawp tlat a, a hlawhtlinna tur pawhin theihtawp a chhuah dawn tih a sawi. MGNREGA chu eirukna leh kaihhruaina chak lo tak hmanga kalpui a nih laiin, VB GRAM G chuan thingtlang lam infrastructure ngelnghet pein, mipuite tan hna thawhna tur remchang tam zawk a siamsak dawn a ni, a ti. He dan thar hnuaiah kum khatah ni 100 inhlawhna siamsak ṭhin chu ni 125-ah tihpun a ni a, hnathawktute pawhin an hnathawh hlawh chu kar khat chhunga pek a ni ang a, tihkhawtlai sak an nih chuan a pung nen pek an ni zel dawn tih a sawi. Technology pawh hman ṭangkai a ni dawn a, langtlang taka kalpuiin biometric attendance, geo-tagging, satellite imagery, mobile monitoring bakah artificial intelligence leh digital payment hman a ni dawn tih a sawi bawk.