India-Israel strategic partnership chungchangah Modi leh Netanyahu inbia

Prime minister Narendra Modi chuan nimin khan Israel prime minister Benjamin Netanyahu chu kumthar chibai buk pahin ram pahnihte'n strategic partnership kaltlanga thawh dunna an lo siam tawh tihchak dan tur chungchang a sawipui.

PM Modi chuan X ah PM Netanyahu nen an inbiak thu hi tarlangin, India-Israel Strategic Partnership chungchangah kumin lo awm leh tur chhunga tihchakna tur lam an sawi thu a tarlang a; hei bakah mahni ram huam chhung ve ve a harsatna awmte thlir dunna nei nghalin, inpekna thuk zawk hmanga firfiaka chetna do let kawnga thawh dunna ṭha neihte an sawi dun tih a tarlang bawk.

Hruaitu pahnihte inbiak hnuhnun ber chu nikum December 10 kha niin, hemi ṭum hian West Asia dinhmun chungchang an sawi dun. Hemi thuah pawh hian PM Modi chuan West Asia leh a chhehvelah remna leh muanna ngelnghet zawk chu Gaza Peace Plan kaltlanga a awm a duh thu a lo sawi lang tawh a ni.

Inbiakna neih hnu hian Netanyahu chuan hruaitu pahnihte chu an inhmu thuai dawn tih a sawi lang zeuh bawk. Thawh dunna tur chungchangah hian nikum December 16 khan external affairs minister S. Jaishankar leh PM Netanyahu-te chu an lo in hmu tawh a, kawng hrang hrang - technology, economy, connectivity leh security-a thawh dunna tihchak dante an lo sawi dun tawh bawk.