Russia president Vladimir Putin chuan prime minister Narendra Modi sawmna ti hlawhtlingin India ram a rawn tlawh dawn niin Russian foreign minister Sergey Lavrov chuan nimin Ningani khan a sawi. Russian International Affairs Council (RIAC) buatsaih "Russia and India: Toward a New Bilateral Agenda" chungchanga Video conference neih naah Lavrov chuan sawiin, hmalakna neih mek a nih thu a sawi. A zin hun tur tak erawh sawichian a ni lo.
Prime minister Narendra Modi hian nikuma thlan tlin nawn leh a nih hnuah, kum nga hnua a vawikhatna atan nikum July thla khan Russia hi a lo tlawh tawh a, hei hi Putin sawmnaa zin a ni. Russia chuan," Kan tih ve hun chiah a ni" tiin Putin a zin tur chungchang hi an tarlang. Modi hi kum 2019-a Russia a tlawh ṭumin Vladivostok khuaa economic conclave hmanna a telpui tawh bawk.
Hetih mek laiin nikum August aṭanga Bangladesh ramchhung buaina avanga tualchhunga Hindu sakhaw vuantute tih duhdahna a thlen hnuah PM Modi chuan, Bangladesh hruaitu lailawk chief adviser Prof Muhammad Yunus hnenah Bangladesh National Day pualin chibai bukna lehkha a thawn.
Bangladesh rama thil thleng vangin India leh Bangladesh inkar hi a ṭhat loh lai tak a ni. Bangladesh prime minister paihthlak tak Sheik Hasina, sahimna zawnga India-a tlan chhia thawn haw ngiat reng a ni , hei bakah tualchhung buaina vanga Hindu leh hnam hnuaihnung zawkte tih duhdahna thleng chu India ram hruaituten an ngaimawh hle.
PM lehkhathawn ah hian,"Vawiin ni kan thlen theihna tur hian kan nun hlui leh kan lo inpumpek ral tawhna in ang te kha a ni. Chu chuan kan pahnih inkar lungphum nghet tak a siam a ni. Bangladesh Liberation War khan kan inkar ṭhatna tur hian kawng min lo sial sak a ni" tiin ram pahnih inkara inzawmna thuk tak chungchang a sawi lang.
