Prime minister Narendra Modi leh Japan sumdawng aiawh, India-Japan Business Cooperation Committee (IJBCC) member lo zinte chu Nilaini, March 5, 2025 khan an inkawm. Prime Minister Office (PMO) in a tarlan danin, IJBCC member 17 te hi an chairman Tatsuo Yasunaga-a'n a ho a ni.
Meeting-ah hian ram pahnihte economy ṭhan lenna tur atana thawh dunna tur lam hawi an sawi ho. An thil sawi zingah hian quality ṭha, man tlawm si hmanga India-a thilsiam chhuah chungchang leh, khawvel huap sumdawnna tih hmasawnna atana thilsiam chhuahna hmun Africa-a siam chungchangte pawh a tel.
Inkawmna hun an hman zawhah hian PM Modi chuan, Japan aiawha lo zin te'n huang zauhna atana India an thlang chu lawmawm a tih thu a sawi. 'Make in India, Make for the World' hlawhtlinna tura an in huamna chu fakawm a tih thu a sawi bawk. Japan aiawh lo kal zingah hian sector hrang hranga hruaitu, manufacturing, banking, airlines, pharma sector, plant engineering leh logistics lama hruaitute an tel a ni.
Nimin khan FICCI, Federation House, New Delhi-ah India-Japan Business Cooperation Committee (IJBCC) annual meeting vawi 48-na chu neih a ni bawk. He hunah ram pahnih aiawhte chuan 'Building India-Japan Strategic Partnerships for Industrial Growth and Regional Development' tih chu thupuia hmangin thawh ho dan tur hrang hrang an sawi ho. Nimina meeting-ah hian Federation of Indian Chambers of Commerce & Industry (FICCI) leh Japan Chamber of Commerce and Industry (JCCI) aiawhte an tel. IJBCC hi kum 1966 a din a ni a, committee hi India aiawhin FICCI & CMD, Apollo Tyres Ltd. president kal chhuak Onkar Kanwar leh Japan aiawhin Mitsui & Co. Ltd. board of directors chairman Tatsuo Yasunaga te hian an kaihruai mek a ni.
