PoK aṭanga Pakistan a chhuah hunah Kashmir buaina a reh ang: Jaishnakar

External Affairs Minister (EAM) S. Jaishankar, UK leh Ireland tlawha zin mek chuan London-a Chatham House chief executive Bronwen Maddox-a an inkawmnaah Pakistan Occupied Kashmir(PoK) aṭanga Pakistan a in lak chhuah hunah Kashmir buaina chu a reh ang, tiin a sawi.

Inkawmna hun hmanah hian Pakistan leh India inkar buaina awm ṭhin zawhna hrang hrang zawh niin Pakistan nen an inkar chingfel tur hian US nen an inṭhian ṭhatna an hmang dawn em tihte zawh a ni bawk. An zawhnate a chhannaah Jaishankar chuan Kashmir chungchang hi a sawi a ni.

Hun an hmannaah hian zawhna hrang hrang zawh niin Pakistan nen a buiana awm te bakah Jammu and Kashmira human right bawhchhiatna thleng chungchangte zawh a ni bawk.

Jaishankar chuan J&K siam ṭhatna tur hian Article 370 hlih chu pawimawh hmasa ber a nih vanga hlih tawh a nih thu sawiin, a dawtah chuan vantlang chawikanna thlen tir te, economy tih hmasawnte chu pawimawh pahnihna a nih thu a sawi lang. Human rights palzutna thleng chungchang zawhna chhangin,"Human rights palzut zawnga khawsakna thleng nasa anga sawi chu thil hriat sual leh dik tawk lo a ni" tiin, "Mahse dinhmun ṭhenkhat, siam ṭhat leh hma lak ngaihnate chu a awm ve bawk" a ti.