India ramah H3N2 virus, 'Hong Kong flu' tih bawk kai chu mi 90 chuang hmuh a ni tawh a, H1N1 virus kai mi pariat hmuh an ni tawh bawk. H3N2 virus kai zinga pahnih chuan an thihpui tih nimin khan sorkar chuan a sawi.
H3N2 virus vanga thite hi Haryana leh Karnataka state-a mite niin, kum 78 leh 82 mi an ni.
Hun rei vak lo liam ta aṭang khan ram chhungah H3N2 flu vei hi an pung chho a, he flu kaite hi influenza subtype dang kaite aiin damdawi-ina enkawl ngai an tam a ni. H3N2 leh H1N1 flu kaite hian Covid-19 symptom ang an nei a; khuh, khawsik, hnaptui, thawk lama harsatnate an neih bakah luakchhuak, hrawk na, taksa kham leh kawṭha lote an nei tel bawk. Heng symptom-te hi kar khat chhungte an nei a ni.
Mithiamte chuan virus hi inkaichhawn awl tak, khuh, hahchhiau leh a kai tawhte nena in khawih aṭanga kaichhawn theih a ni tih an sawi.
Doctor-te chuan heng virus laka inveng tur hian Covid-19 hri laka invenna ang khan kalpui a ṭul thu sawiin, kut sil ngun leh face mask vuah ṭha turin mipuite an chah.
Indian Council of Medical Research (ICMR) chuan hahchhiau leh khuh laia ka leh hnar hup tur te, tui in tam tur leh, midangte kut leh hnarte khawih lo turin thurawn an lo tichhuak tawh a, khawsik leh taksa na/kham neite chu paracetamol ei turin an ti bawk. Indian Medical Association chuan doctor-te hnenah pawh an nat dante finfiah a nih hma chuan damlote chu antiobiotics chawh nghal lo turin an lo chah tawh bawk a ni.
He flu hi naupang kum nga hnuai lam leh, kum 65 chunglam ten an kai awlsam bik a, hei bakah natna benvawn nei leh immune system ṭha tawk loteah a thawk na zual thei bawk.
