Kavitha-in Women's Reservation Bill pass phûtin nawrh huaihawt

Bharat Rastra Samithi (BRS) hruaitu leh Telangana chief minister fanu, K Kavitha chuan hun rei tak tihkhawtlai tawh, Women's Resrvation Bill pass phutin nimin khan New Delhi-a Jantar Mantar-ah chaw ngheiin nawrh a huaihawt.

Nimina nawrh huaihawt hi CPI-M hruaitu Sitaram Yechury-a'n a hawng a, Samajwadi Party leader Seema Shukla, Telangana education minister Savita Indra Reddy leh women and child welfare minister Sathyavathi Rathore-ten an telpui. Anni bakah eptu pawl hrang hrang - AAP, Akali Dal, PDP, NC, TMC, JDU, NCP, CPI, RLD leh Chiva Sena hruaituten an telpui bawk.

Yechury chuan women's reservation bill pass a nih theihna atana Kavitha hmalakna chu an party chuan an thlawp zel dawn tih a sawi. "Politics-a hmeichhiate hun ṭha leh remchang siamsakna turin he bill hi a pawimawh takzet a ni," a ti.

Kavitha chuan,"India-in hma a sawn dawn chuan hmeichhiaten politics-ah chanvo pawimawh tak an chelh ve a ngai. Hemi atan hian kum 27 zet tihkhawtlai tawh, he bill hi pass thuai a ngai a ni. Tun hi bul kan ṭanna chauh a ni a, ramchhung hmun hrang hrangah nawrh hi kan la huaihawt zel dawn a ni," tiin a sawi.

Women's Reservation Bill-ah hian Lok Sabha leh state legislative assembly tinah hmeichhiate tan seat 33% dah tura tih a ni a, he bill hi kum 1996, September 12 khan United Front sorkar chuan Lok Sabha-ah a pharh a, mahse an pass thei lo.

Kum 2008, May khan Congress kaihhruai UPA-1 sorkar chuan Rajya Sabha-ah pharh ve lehin pass a ni a, mahse standing committee ngaihtuah tura thawn a ni leh. Kum 2010-ah House chuan pass-in Lok Sabha-a thawn a ni a, mahse 15th Lok Sabha-ah ngaihtuah hman loh a awm a, tun thlengin an ngaihtuah zui ta rih lo a ni.

Prime minister Narendra Modi chuan kum 2014 leh 2019 Lok Sabha inthlanpui neih dawn khan, a kaihhruai sorkar chuan he bill hi a ngaihtuah dawn tih sawiin, BJP election manifesto-ah pawh telh a ni. Mahse an sorkar hnuah BJP hruaitu zingah tumahin he bill hi an la sawilang lo a, Parliament-ah majority nei chungin Modi-a kaihhruai sorkar chuan tun thlengin a la pass thei lo tih Kavitha chuan a sawi.