Prime minister Narendra Modi chuan nimin khan Rashtrapati Bhavan leh India Gate inkar, Rajpath tih ṭhin, Kartavya Path tia thlak tak siamṭhat chu a hawng.
Rajpath hming thlak a nih tak avangin New Delhi Municipal Council (NDMC) chuan Rajpath singboard tarte pawh, 'Kartavya Path' signboard-in a thlak nghal vek a ni. NDMC hian Nilaini khan Kartavya Path tia thlak rawtna hi a pawm a ni.
Shapoorji Pallonji and Company Limited chuan Vijay Chow aṭanga India Gate inkar kawng cheiṭhat hna hi thawkin, project hi Rs vbc 477 in an chhang. He cheiṭhat hna hi Central Vista redevelopment project hnuaiah thawh a ni.
CPWD hian vending zone panga siamin, zone pakhatah hian vendor 40 zel an awm phalsak an ni a, India Gate bul hnaiah block pahnih siamin, dawr pariat ve ve siam a ni bawk. State ṭhenkhat chuan heng hmunah hian food stall siam an duh thu an sawi.
Prime Minister Office chuan, Central Vista Avenue-a Rajpath (Kartavya Path ni ta) leh a chhehvel chu tlawhtu an tam lutuk avangin a infrastructure dinhmun thlengin a ngaihtuahawm tih a sawi. Hei bakah thil pawimawh - public toilet, tui thianghlim in tur, street furniture leh parking space-te a ṭha tawk lo a, a enkawlna pawh a duhthu a sam lo tih a sawi. Hei bakah Republic Day parade leh national event pawimawh dang buatsaih dawn pawhin, mipuite chetvelna kawnga harsatna thlen lo thei anga thiltih a ngai ṭhin a ni, a ti. Heng zawng zawng ngaihtuah hian, a cheiṭhat hna hi thawh a ni tih a tarlang.
'Kartavya Path'-ah hian landscape mawi tak tak te, walkway te, hmun hring nuam tak, canal siamṭhat, amenity block thar, singboard mawi zawkte a awm tawh a ni. Parking space pawh siamṭhat niin, exhibition panel thar leh, night lighting pawh tihṭhat a ni bawk.
Official chuan canal acre 19 chu cheiṭhat a ni a, aerator-te dah a nih thu a sawi. Kawngah hian bridge 16 a awm a, canal pahnih - Krishi Bhawan leh Vanijya Bhawan bulah lawng hman phal a ni.
Khawpui chhunga mipuite tlawh duh hmun lar tak a nih avangin a hmunhma vawnfai chu ngaihpawimawh a ni dawn tih sawiin, mipuite pawh vawng fai turin an chah a, a tifaitu ṭhahnem tak dah an ni bawk tih official chuan a sawi. Kawng sirah hian bench 400 chuang, dustbin 150 dah a ni bawk.
Prime Minister hian India Gate-a Netaji Subhas Chandra Bose lim pawh a hawng nghal bawk. He lim hi sculptor team-in darkar 26,000 chhung an siam a ni. Milim siamna tur granite lung hi Telangana- Khamman aṭanga lak niin, Delhi-a phur tur hian feet 100-a sei truck a bikin siam a ni a, km 1,665 a thui a phur a ni.
Netaji lim hi kumin January 23-a a piancham puala Prime Minister in a lo hawn, 'hologram statue' awmna hmunah dah a ni.
September 9, 10 leh 11 zan dar 8-ah India Gate-ah hian Netaji chanchin tarlangin, minute 10 awh drone show neih a ni ang. Mipuiten a thlawnin an en thei ang.
