India ramah a zawnin ni thum chhung Covid-19 hri kai an pung thar leh a, Zirtawpnia hri kai hmuh chhuah thar chu a hma ni aiin 27% in an pung. Thawhṭanni aṭang khan nitina hri kai thar hi a let 2.6 chuangin a pung chho tawh a ni.
Ningani khan India ram pumah hri kai hmuh chhuah thar 16,695 an awm a, ni 71 hnua ni khata hri kai an tam ber ṭum a ni leh.
Khawpui lian - Mumbai, Delhi, Kolkata leh Benagluru-ahte hri kai hi an pung leh nasa tawh le a, Kerala leh hmarchhak statete tih loh state dang zawngah pawh hri kai hian pun lam an pan leh tawh bawk.
Covid-19 hri chi thar darh mek, Omicron variant kai pawh India ramah kai an pung zel a, state 23-ah he variant kai hi hmuhchhuah ni tawhin, nimin thleng khan Omicron kai hi 1,270 an awm tawh a ni.
Union health ministry-in a tarlan danin, Omicron kai hi Maharashtra state-ah 450 hmuh an ni tawh a, Delhi-ah 320, Kerala-ah 102, Gujarat-ah 97, Rajasthan-ah 69 leh Telangana-ah 62 an awm tawh. Omicron kai zinga 374 chu enkawl dam an ni tawh bawk.
Sorkar laipui chuan Covid-19 hri kai pun thar lehna state-te chu fimkhur lehzual tura chahin, test,contact tracing, isolation leh quarantine-te chu ṭha zawka kalpui a, vaccine pek chhuah pawh chak zawka kalpui turin a chah. Containment zone leh buffer zone-te pawh siam leh tur leh, hospital leh Covid centre-te pawh emergency awm palh atana inbuatsaih lawk vek turin a ti bawk a ni.
Data aṭanga a lan danin, India rama Covid-19 hri thawh hnihna a len lai, March-April a hri kai an pun chak dan aiin tuna hri kai pun thar lehna hi 21% in a chak zawk tih an sawi.
