Nagaland-a security force-ten kar liam ta Inrinnia civil mi 13 an kahhlum chungchangah, Nagaland police-te chuan Indian Army-a 21 para special force-te lakah tualthah thubuai an ziak lut.
Security force-te hian Inrinni liam ta khan Mon district-ah helpawl mi leh sa an awm nia thu an dawn vanga beihpui an thlaknaah, truck pakhata civil mi chuangte chu hel emaw tiin an kap niin an sawi. Truck an beihnaah hian a hmunah civil mi paruk an kaphlum a, mi pahnihin hliam an tuar bawk. He truck-a chuangte hi civil mi, lungalhthei khura thawk vek nia sawi an ni.
He thil thleng avang hian tualchhung mipui thinrimin army team hi beiin, sipaite hian silaiin mipuite hi an lo kap let a, mi panga an kahhlum bakah mi dang tam takin hliam an tuar. He inbeihnaah hian sipai pakhat a thi tel bawk.
Nagaland police-te chuan sipaite hian Mon district-a hel laka beihpui thlak an tum chungchangah engmah an hriattir lo a, Assam Rifles lam pawh an hrilh lo niin an sawi.
State chief minister Neiphiu Rio chuan civil mite beihna thleng chungchang chhui chiang tur hian IGP level officer kaihhruaiin high-level Special Investigation Team (SIT) a din nghal a, nimin khan Mon district hi a tlawh bawk. Nagaland sorkar chuan sipaite kahhlum, civil mi 13 chhungte hnenah zángnadawmna Rs nuai 5 ṭheuh pek an nih tur thu a puang tawh a, hliam tuarte enkawlna senso pawh state sorkarin a tumsak vek dawn bawk.
Senior minister P Paiwang Kongyak hoin DGP leh police officer team chuan pawikhawihna thlenna hmun, Mon district-a Oting khua hi an tlawh tawh a, deputy chief minister Y Patoon pawhin Delhi aṭanga a zin haw lam chu Guwahati aṭangin Mon hi a pan tlang nghal bawk a ni.
